Nes caberes décades asistimos  a un progresivu emponderamientu oficial de la romanidá xixonesa y asturiana. Dos arqueólogos apurren prebes de que nun ye más qu’otra falacia qu’allonxa a los asturianos de los sos braeros raigaños

«Nun esisten argumentos oxetivos que respuendan pola identificación de Xixón como un conxuntu urbanu, seya cual fora la so categoría y entidá. En llóxica consecuencia, el so nome tendría de ser escluyíu del corpus de ciudaes romanes d’ Hispania» declaren dos arqueólogos, nel so artículu ‘Xixón en tiempos romanos dempués de 40 años d’arqueoloxía urbana’

Trés de décades de romanización tardio y depués de xeneraciones convenciendo a la xente de lo romanos que somos, dos espertos, César García de Castro Valdés (Muséu Arqueolóxicu d’Asturies) y Sergio Ríos (Conseyería de Cultura),  vienen decir lo que munchos defendieron siempres, poniendo en dulda que Xixón fore una ciudá romana.

Como muncho, dicen, trátase d’una villa a mare, con una única vivienda, de la que formaron parte les termes y de la que dependió una istalación de salazones. “Nun hai razón nin fundamentu arqueolóxicu para defender la esistencia d’una ciudá romana en Xixón” defendieron nel alcuentru científicu ‘Small Towns. Una realidá urbana na Hispania romana’.

Nun hai resclavos d’edificios monumentales nin de cemeterios, nun s’identifíca nin una cai, nin cadarmes d’apurrimientu d’agua o saneamientu, nin aceres o pavimentos, nin espacios públicos comu foros o templos nin cases o viviendes de dala triba. Ello ye, nun hai dalu niciu de vida urbana. Por nun haber nun hai nin restos d’ánfores. La lliteratura xeográfica grecollatina recueye’l nome de Gigia comu ciudá romana, si, pero allugada’n Llión, non na mariña asturiana.

Nun hai argumentos tampocu, a falta de prebes radiocarbóniques, pa defender que la Muralla seya de los sieglos III ya IV, comu asumir, nin foi tampoco Cimadevilla meta nin orixe de camín públicu dalgunu, muncho menos puntu final de la Vía de la Plata. La hestoria que mos vienen cuntando paez ser que yera un cuentu, empobináu a xenerar enquivocos y a que los xixoneses y asturianos nun conozan la so braera hestoria.

This work is licensed under a Creative Commons Attribution 4.0 International License.