Bonos díes, bona xente.

Alborecemos col cielu poco nuboso o escampláu ya con unes temperatures que tan alrodiu de los 3ºC, rexistrándose nel puirtu Payares 0,9ºC.

Güei vamos tener el cielu poco nuboso o escampláu con delles xelaes nes zones favoretibles al alborecer que darán pasu a un día soleyeru y prestosu, caleciendo la llume del sol l’ambiente al mediudía, sicasí nel llitoral y zones altes l’aire nordés pue baxar dalgo la sensación térmica.

Mañana vienres volveremos alborecer col cielu escampláu y xelando no fonderu los valles con unes temperatures mínimes en descensu nes zones d’iversión térmica y sin camudos en les másimes que malpenes superarán los 10ºC a la solombra, tando muncho más afayaizu al sol al abellugu del nordés que pue soplar dalgo nel llitoral.

El sábadu sedrá un día mui asemeyáu col cielu escampláu, sicasí subirán mui llixeramente les temperatures mínimes y másimes. Y el domingu l’aire nordés va dir coyendo fueye apurriéndonos dalgo de nubosidá sobre too pela tarde con unes temperatures en llixeru ascensu anque la sensación térmica seya menor por mor del vientu.

Pa la selmana viniente paez que tendemos dalgo de nordés con un descensu de les temperatures pero esto yá lu diremos viendo.

Semeya de la estación ivernal de Valgrande Payares, onde estos díes los esquiadores tan esfrutando de unes condiciones inmeyorables pola cantidá y calidá de la nieve, amás de los díes soleyeros.