A les ya antigües denuncies d’acosu ya incumplimientu de drechos llaborales nel HUCA súmense dende va un tiempu les encerrones, presiones y menacies direutes a trabayaores “conflictivos” por denunciar publicamente la situación
Continúen les movilizaciones de protesta nel Hospital Universitariu Cientral d’Asturies (HUCA), dos ya nel primer mes del añu. Negación de la conciliación familiar y descansos llegales, falta de material, horarios variables, impagu d’hores estres, desorganización de les vacaciones, escesos de xornada, escasez de personal, peligrosa xestión del COVID… son dalgunes de les acusaciones que’l personal del HUCA lleven tiempu faciendo a la xerencia l’hospital, cuestiones que non solo xeneren problemes llaborales, sinón qu’amenorguen bultablemente l’atención al paciente. Neses condiciones ye comprensible que cueste alcontrar personal sanitariu dimpuestu a trabayar n’Asturies.
Fasta agora, la única “rempuesta” a estes reclamaciones foi aumentar la presión sobre aquellos emplegaos que reclamaren los sos drechos, tratando de silenciar la situación. En vista d’ello CCOO plantégase entamar aiciones llegales contra los episodios d’acosu llaboral, reclamando la depuración de responsabilidaes nesi tema.
Redaición InfoAsturies
.
This work is licensed under a Creative Commons Attribution 4.0 International License.
