Entantu les autoridaes competentes permiten l’esbarrumbe de dellos exemplares d’esta edificación identitaria asturiana, l’aniciativa popular va iguando horros por cuenta propia
L’horru de Zapata ta na Braña de Senra (conceyu Yernes y Tameza), a 910 metros d’altor sobre la mar; ye un horru piqueñu, destacable poles sos prestoses talles, pero tamién pol so allugamientu: esta ye una de les dos úniques brañes d’Asturies, cola de La Viña en Cangas, onde alcontramos un horru. Fasta esti añu, el pasu’l tiempu y les dures condiciones climátiques taben dañándolu seriamente, lo qu’esmolecía a los munchos de los montañeros que pasen per delantre nes sos escursiones.
Cansaos de pasar per delantre nes sos rutes y de ver comu, pali que pali, diba esbarrumbando, los componentes del Grupu Montañeru Moscón decidieron tomar midíes y remocicalu ellos mesmos. El resultáu garantiza la pervivencia d’esta pieza del padremuñu asturianu, una ente les munches que dependen del bon facer de los ciudadanos pa sobrovivir, nun país comu’l nuesu nel que los encargaos teóricos de la proteición del padremuñu esperen con pacencia a ver esbarrumbar los ñicios de la nuesa cultura.
Gracies, moscones.
Alberto Rodríguez
This work is licensed under a Creative Commons Attribution 4.0 International License.
