Una investigación espublizada na revista “The Extractive Industries and Society” cuantifica la obvia perda de producción, oportunidaes y riqueza qu’implicó pa les dos cuenques el preslle de los pozos
Un 44%, esi ye’l porcentaxe calculáu de riqueza perdio poles Cuenques del Caudal y del Nalón por mor del preslle de les mines. Esteban Fernández Vázquez, catedráticu del departamentu d’Economía Aplicá na Universidá d’Uviéu ya investigaor nel REGIOlab, Llaboratoriu d’Analís Económicu Rexonal, ye l’autor del artículu “Mine closures and local diversification: job diversity for coal-mining áreas in a post-coal economy” (Preslles de mines y diversificación llocal: la diversificaciónl laboral en zonas de minería del carbón na economía post-minera). L’0xetivu l’artículu ye l’analís de la diversificación en fasteres que perdieren la so cimera fonte de xeneración d’emplegu, siendo’l de les mines asturianes presentáu comu casu d’estudiu qu’amuesa la teoría.
Pa valorar l’impautu real del preslle de les mines, Vázquez creó virtualmente unes Cuenques del Caudal y el Nalón nes que les mines siguieren furrulando, xenerando un escenariu económicu paralelu de magar l’entamu de los noventa, cuando les mines entamaron a carecer retayos.
Los resultaos rescamplen el tremendu erru económicu y social implícitu nel abandonu de les mines y les consecuencies de la falta d’enfotu en defendeles por parte’l gobiernu del PSOE. De continuar abiertos los pozos, el valor añadíu de los valles del Nalón y Caudal duplicaríase de los noventa acá y les cuenques sedríen un 44% más riques de lo que son agora, con cuasi el duple d’oportunidaes llaborales qu’anguañu, lo que, de pasu, revertiría la xabaz perda de población de los conceyos afeutaos.
Redaición InfoAsturies
This work is licensed under a Creative Commons Attribution 4.0 International License.
