Iniciativa pol Asturianu denuncia qu’a un ciudadanu se-y torgue que nel so carné apaeza la toponimia oficial de Corvera, situaciones que dexaríen de dase si se declarare d’una bones la oficialidá del asturianu

Iniciativa pol Asturianu recibió ayeri la quexa d’un ciudadanu qu’al renovar el so Documentu Nacional d’Identidá na Comisaría de la Policía Nacional d’El Natahoyo, en Xixón solicitó la presencia de la toponimia oficial del llugar de residencia (Les Vegues, Corvera). Énte esta solicitú, la funcionaria declaró que nun ye posible, ya que’l sistema namás almite ‘Las Vegas’ na selección de topónimos y que’l topónimu tradicional y oficial (‘Les Vegues’) nun ta codificáu.

El ciudadanu, suponiendo les posibles dificultaes, yá denunciaes n’otros casos pola nuesa asociación al reclamar l’aplicación de la toponimia oficial, aportó un certificáu del Institutu Nacional d’Estadística y tamién d’empadronamientu col topónimu ‘Les Vegues’.

Nesi momentu, l’afectáu contacta con Iniciativa pol Asturianu, solicita a la funcionaria la rempuesta per escritu de la problemática ya insiste, otra vuelta, na posibilidá de cuntar nel so DNI cola presencia del topónimu oficial.

A la fin, por mor de les prises, el ciudadanu tien qu’aceptar el nuevu carné cola toponimia en castellán (‘Las Vegas’). Al colar, intentó presentar una quexa nel espaciu d’información nel que yá nun s’atopaba naide al ser más de les 15:00 hores.

La organización de reivindicación llingüística recalca que “la toponimia oficial ye Las Vegas / Les Vegues tal como recueye’l Decretu 6/2007, de 31 de xineru, pol que se determinen los topónimos oficiales del conceyu de Corvera d’Asturies. La presencia y usu de los topónimos oficiales de los diferentes conceyos na renovación de los DNI nun puede suponer un perxuiciu pa les persones que llibremente lo reclamen”.

Tres la problemática del ciudadanu, Iniciativa pol Asturianu presentó delles reclamaciones énte Delegación de Gobiernu y énte’l Defensor del Pueblu desplicando’l casu y reclamó nel escritu l’actualización de les bases de datos pal usu de la toponimia oficial a toles instancies, de manera que les lleis autonómiques seyan respetaes y que nengún ciudadanu seya discrimináu pol usu de los topónimos tradicionales.

L’asociación considera que “nesa adaptación a los Decretos de Toponimia de los Conceyos, sería lóxico que los nomes de llugar salgan de forma automática na aplicación informática y nun dependan del pidimientu del ciudadanu pa llevalos n’asturianu, como asocede agora”.

Alberto Rodríguez

This work is licensed under a Creative Commons Attribution 4.0 International License.