Un estudiu empobináu pol catedráticu de Bioquímica y Bioloxía Molecular de la Universidá d’Uviéu Carlos López Otín y l’investigador de la Universidá de París Guido Kromer definió trés nuevos procesos moleculares y celulares que causen l’avieyamientu humanu

Les primeres nueve claves del avieyamientu salieron a la lluz en 2013 n’una investigación tamién empobiná por Carlos López Otín. N’esi revolucionariu estudiu falábase de nueve factores que, de manera conxunta, contribúin al nuesu deterioru celular y funcional acomuñáu al pasu del tiempu. Agora, a eses nueve claves amiéstense otres trés, la inflamación crónica, la disbiosis y les alteraciones na autofaxa.

Estos descubrimientos, espublizaos na revista americana “Cell”, abren la puerte, según Otín, a diseñar estratexes d’intervención sobro los mecanismos qu’inflúin na vieyera, col envís d’ameyorar la nuesa calidá de vida, allargando la vida.

Les claves del avieyamientu clasifíquense’n trés grandes categoríes: primarios, antagonistes ya integradores. Los factores primarios son los desencadenantes del procesu y ente ellos atopamos la inestabilidá xenómica, l’acurtiamientu de los telómeros, les alteraciones epixenéticas, la perda de la proteostasis y según los nuevos descubrimientos, les alteraciones na autofaxa. Los factores antagonistes engloben les estremaes rempuestes del organismu p’apangar el dañu producíu polos factores primarios, que pueden llegar a ser tamién perxudiciales; son la desregulación de los sensores nutricionales, la senescencia celular y la disfunción mitocondrial. A lo último, los factores integradores, que son los principales responsables del avieyamientu, son l’escosamientu de les reserves de célules proxenitores y les alteraciones nos mecanismos de comunicación intercelular, a les que’l recién estudiu suma la inflamación crónica y la disbiosis o perda de diálogu ente’l xenoma humanu y el de tolos microorganismos que nos habiten.

Alberto Rodríguez

This work is licensed under a Creative Commons Attribution 4.0 International License.