Pente otres consecuencies, la maniobra valdría pa espulsar a Jorge Fernández, qu’algamó 1312 votos nes primaries, upando dos puestos al portavoz parlamentariu, Rafael Palacios, con namás 1.115
El Conseyu de Coordinación de Podemos Asturies abre espedientes disciplinarios a tres militantes, l’ex secretariu xeneral de la formación morada n’Asturies, Daniel Ripa, l’ex parllamentariu pola circuscripción ocidental Andrés Fernández Vilanova “Ron”, y l’actual miembru’l Conseyu Ciudadanu Autonómicu Jorge Fernández Iglesias. acúsase-yos d’atacar al partíu, desprestixalu y “acusar de forma infundada y reiterada a les direiciones autonómica y estatal de Podemos de fechos mui graves”, por denunciar les munches irregularidaes que, acordies los tres exdirixentes, tienen llugar nel senu la formación. Los tres acusaos ficieron pública información sobre maniobres elleutorales de dudosa llexitimidá, dispidos improcedentes, menacies y otres cuestiones d’indole asemeyao, presuntamente llevaes a cabu pola actual direición autonómica del partíu.
Con ello, Podemos Asturies da otru pasu nel camín de desintegrase a si mesmu: de llevase a cabu la menacia contra Daniel Ripa, Vilanova y Fernández Iglesias, esti sedría el décimu procesu d’espulsión de la formación morao en menos d’ún añu.
A naide escapa que les midies afeuten a dirixentes q’apoyaron a Covadonga Tomé, ganaora de les primaries, y que son tomaes polos sos oponentes direutos nes mesmes, Sofía Castañón y la so camarilla, na que destaca pol so historial trepaor Rafael Palacios.
Redaición InfoAsturies
This work is licensed under a Creative Commons Attribution 4.0 International License.
