Delles cifres pa entamar l’añu

  • 3 Xineru, 2023

Les cifres que dexa tres de si’l 2022 rescamplen, n’Asturies lleva tiempu siendo urxente tomar midies contra la probitú, el desemplegu y la precariedá

Asturies ye’l territoriu del Estáu Español nel que más medró la probitú de magar el 2015. Hai 63.000 asturianos en paru, la metá d’ellos de llarga duración, paru xuvenil de más del 43% y la mayor fienda salarial por sesu de tol estáu. El resume de la situación del mercáu llaboral n’Asturies ye tarrecible, lleva décades siéndolo y nun tien pinta de revertise la situación.

Hai más de 167.000 persones n’Asturies que nun algamen los 12.000 euros d’ingresos al añu, el 60% d’ellos son xubilaos en situación d’estrema vulnerabilidá frente a la descomaná inflación del caberu añu. L’incrementu de les pensiones, porcentual, nun fae sinón agrandar la fienda pente los que más y los que menos tienen.

La redución de la temporalidá ye otru espeyismu, cola xeneralización de la figura del fixu discontinuu alcontrámonos con que nun hai despidos, pero tampocu trabayu, nin salariu. El contratu nun fina, desaniciando cualisquier drechu de lliquidación, cenciellamente mándase al trabayaor pa casa a esperar a que la empresa lu torne necesitar, perdiéndose tolos drechos con que se falle una vegada al llamáu del contratante.

Hai menos desemplegu, pero tamién menos contratos, una paradoxa que se desplica coles altísimes tases d’emigración que saquen a la mocedá asturiana non solo del país, sinón de les llistes del paru . No que cinca a los autónomos, Asturies pierde una media de dos al díe.

En términos xenerales, los coleutivos más precarizaos y con menos perspeutives de salir del furacu son la mocedá, les muyeres y los mayores de 45 años en paru, lo que pue resumise en que los únicos que tienen dalguna oportunidá son los homes d’ente 25 y 45, una fración bien piqueña de la población.

Falando de población, cerca de dos asturianos de ca mil abandonaron Asturies esti añu a la gueta trabayu, acordies a la media oficial. Amás, el saldu vexetativu n’asturies marca  menos 23 asturianos al día, unos 9.000 al añu, continuando na llinia que mos llevó a la perda d’alrodiu del 12% de la población en 40 años. Namás cuatro de ca diez muyeres que viven n’Asturies tean n’edá fértil, y la población mayor de 65 años representa más del 57%.

Redaición InfoAsturies

This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies