• Portada
  • >
  • Muyer
  • >
  • Les asturianes siguen lluchando pola vida y por un trabayu dignu

Les asturianes siguen lluchando pola vida y por un trabayu dignu

  • 30 Avientu, 2022

Asociaciones feministes denuncien en Xixón la violencia machista y asesina, mentantu les trabayaores de Gerusia protesten porque malcobren

MUYERES EN XIXÓN

Esti miércoles, comu tolos caberos miércoles de mes, axuntáronse énte l’edificiu de la Gota Llechi, en Xixón, estremaes asociaciones defensores de los drechos de la muyer: Asturies Feminista 8 M, Asociación Amamantar, APG, Plataforma SAD Asturies, Andecha Astur, CSI Feminismu’n llucha, Anticapitalistes, Verdes Equo, Podemos…

Nuna numberosa concentración, convocá a les 19 h., les muyeres denunciaron con claridá cómu la violencia machista ye daqué más qu’una modalidá de violencia, y cómu les 93 muyeres muertes por esa causa nesti añu son daqué más que muyeres muertes. Trátase de violencia asesina y de muyeres asesinaes.

Nesta ocasión foi l’Asociación Amamantar la encargá d’organizar la concentración mensual, que cuntó con una escenificación espectacular: 93 muyeres asturianes, col rostru tapáu con un mázcaru blancu y con un cartelu que llevaba’l nome de caúna de les 93 muyeres asesinaes en 2022 nel Estáu español, foron ocupando les grades de la plaza mentantu se pronunciaba n’alto’l so nome.

La vocera de l’Asociación Amamantar, Alejandra Barbé, dio lletura a un emotivu testu que, a lo cabero se pue consultar íntegru, y que finaba con estes pallabres sobro la violencia machista: “Énte tala irresponsabilidá, vamos peresforciamos na nuesa llucha. Caltengamos vivu’l recuerdu d’aquelles que mos foron arrebataes. Y caltengamos nel puntu mira a tolos cretinos que direuta ya indireutamente exercen la so violencia escontra nós. Nosotres, que damos a lluz la mesmísima vida. Nosotres, somos poderoses. Y venceremos”. Alejandra Barbé dexómos estes declaciones…

(l’artículu continua depués del vidiu)

MUYERES N’UVIÉU

Ayeri, xueves, cellebróse n’Uviéu un manifestamientu de sofitu a les trabayaores de Gerusia, una de les empreses que s’arriquecen prestando sirvicios d’aída a domiciliu. La plantía tuvo’l sofitu del restu la Plataforma SAD-Asturies y d’organizaciones comu Andecha Astur, SUATEA, Anticapitalistes, cuntando tamién cola presencia de Daniel Ripa, diputáu de Podemos.

Un manifestamientu bien animáu, con tambores y cancios, percorrió les cais d’Uviéu denunciando cómu les trabayaores de Gerusia sufren, comu tol colleutivu SAD, d’un conveniu pésimu que CCOO y UGT firmaron a la patronal. Pero, amás, tuvieron trabayando, durante un tiempu ensin recibir la paga estra correspondiente al mes d’avientu y ensin saber si la recibiríen. Finalmente, en cuantes entamaron les movilizaciones, la empresa ingresó-yos esta paga. Sicasí, entá nun cobraron la xuba salarial que reconoz el conveniu firmáu. Esto ye, Gerusia tien trabayando a una plantía muyeres a les que nun-yos paga comu correspuende.

Eso foi lo que denunciaron nel manifestamientu qu’entamó énte les oficines de Gerusia y finó énte la Xunta Xeneral, un edificiu apináu de testigos silenciosos y cómplices de los abusos llaborales que sofren les asturianes y asturianos.

Marileny Torres, vocera de les trabayaores de Gerusia, fízo les siguientes declaraciones…


This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies