Mariano Suárez Rodríguez
Xunta Executiva d’Andecha Astur
La estadística vien de convertir la Nuechi L’Anguleru n’otra cosa mui estremá de lo que yera. Hai unos años si una neña perdía’l sueñu esa nuechi, podía sintir a L’Anguleru pelos pasiellos de casa
Anguañu la rialidá ye otra. La estadística apunta a que si esa nuechi pierdes el sueñu ties poques posibilidaes de ver a L’Anguleru. Porque cuasi seguro podrás ablucar viendo pelos pasiellos del to llar a Pedro Sánchez, a dalguna de les sos ministres, a Adrián Barbón o a dalgún de los sos conseyeros, dexando nes tos zapatielles el cheque familia, el cheque gasolina, el cheque mozu, el cheque bebé, el cheque emprendeor…
El “gobiernu más progresista de los Borbones”, PSOE + Podemos + IU, comu si d’ún xateru clásicu se tratare, saca 4,3 millones € del xilecu pa dar cheques familia, por valor de 200 € a families de rentes baxes. Al tiempu reconvierte’l cheque gasolina de 20 céntimos/llitru, quitándo-ylu al públicu’n xeneral y dexándolu comu regalu esclusivu pa tresportistes profesionales. Per otru llau, anden dando’l cheque mozu, 400 € pa los qu’estrenen los 18 años y que puen gastar en teatru, cine, conciertos, museos, festivales y tamién, cómu non, nuna necesidá cultural tan básica comu los videoxuegos.
Al son de la mesma gaita bailla Barbón, claro. Nun podía ser d’otru mou tratándose d’un “socialista” tan obediente, que gobierna Asturies al gustu, non de les asturianes, sinón de Madrid. Ya imprime cheques, amás, col sofitu del “comunismu” oficial, Izquierda Unida.
Y perhí anda Barbón, la Nuechi L’Anguleru, dexando cheques bebé: donativu de 1000 € si la familia ingresa menos de 45.000 al añu. Y tamién cheques emprendeor, destinaos a emprendeores, reemprendeores y relevistes empresariales.
Falamos, claro ta, de cheques que se convoquen con una burocracia enforma enguedeyá pa la mayoría la población, que s’entreguen tardi, que tienen una vida curtia comu apañu social y que nun lleguen a los bolsos de tola ciudadanía que vive’n situación de precariedá.
Cheques y más cheques. Donativos istitucionales. Llimosna potestativa. La nuea versión de la caridá del réxime vixente. Esos cheques de los gobiernos PSOE-Podemos-IU ufren el soníu perversu de la caridá, tienen l’oxetivu vergoñosu de cautivar el votu y son el camín más rápidu pa evitar lo xusto y necesario: esfacer l’actual sistema sociopolíticu, recreando ún nueu sobro principios sólidos de xusticia social, igualdá y participación popular.
Los cheques caritativos de la “esquierda” española, amás de sofitar al capital y el sistema vixente (borbónicu y de casta), conderguen a Asturies a l’ansiedá de les convocatories burocrátiques de BOES y BOPAS y al pánicu social que xenera’l cortoplacismu d’esos cheques que caduquen.
Sicasí, n’Andecha Astur tenemos alternatives. La precariedá que l’Estáu español mos xenera, col protagonismu cómpliz d’esa supuesta “esquierda” española, nun s’ataya cola caridá d’unos cheques, sinón con midíes radicales que camuden el sistema. Poro, insistimos nel valir que tien la nuesa propuesta de “¡Dami tira! 100 propuestes escontra la precariedá”. Al rodiu d’esi documentu, seriu, bien aposentáu, coherente, posible y que supondría revolucionar el sistema, tamos dimpuestes a collaborar con tola xente que, dende un sentimientu asturianu y d’esquierdes, quiera trabayar a comuña pa garantizar el futuru d’Asturies.
Redaición InfoAsturies
This work is licensed under a Creative Commons Attribution 4.0 International License.
