El Vicepresidente del Principáu d’Asturies y Conseyeru d’Alministración Autonómica, Mediu Ambiente y Cambéu Climáticu tuvo’l deshonor de recibir el galardón que-y acredita como enemigu de la naturaleza y el mediu ambiente asturianu
Per trixésimu añu consecutivu, la Coordinadora Ecoloxista d’Asturies fizo’l día de los Santos Inocentes la entrega simbólica de la Bullada de Purpurina, “un premiu que nun ye nenguna chancia y que reconoz el llabor y acciones de les persones, empreses, instituciones y/o alministraciones que más destacaron nel so llabor en contra del caltenimientu de la naturaleza y el mediu ambiente asturiano.
Esti añu, tres un refechu analís, alderique y deliberación preselecionóse pente toles candidatures propuestes, toes elles merecedores de la distinción, un total de seyes posibles premiaos: l’Alcalde de Siero, el Xulgáu Contenciosu 1 de Xixón, ENCE -la papelera de Navia-, ArcelorMittal Asturies, Orovalle y el Vicepresidente del Principáu, Juan Cofiño González, quien foi’l finalmente escoyíu.
Como ven, nun lo tuvo fácil pa faese cola Bullada, pero la so dilatada hestoria en contra de les condiciones medioambientales y de salú de los asturianos, que inclui el so proyeutu llei ambiental, l’apioramientu de la contaminación, pirólisis, ocalitos, eólicos, etc, llevó a la Coordinadora Ecoloxista d’Asturies a considerar que yera’l más afayaizu pa recibir esti deshonor.
Mención especial merez el so proyectu de llei ambiental, que va autorizar empreses contaminantes ensin dengún tipu de control, suponiendo en casu d’aprobase esta llei, un riesgu pa la salú de les persones y los ecosistemes, anteponiendo los intereses económicu y particular.
Pente los méritos que lu faen acreedor de la Bullada tan tamién les sos declaraciones nes qu’anecia’n que la contaminación del aire “nun ye un problema ambiental”, negando los malos datos del aire qu’alendamos y acusando a la Coordinadora Ecoloxista d’ “utilizar los datos oficiales de forma torticera”.
Redaición InfoAsturies
This work is licensed under a Creative Commons Attribution 4.0 International License.
