Les trabayaores del Serviciu d’Atención a Domiciliu -SAD- llamen a aconceyase na tardi del xueves 29 en defensa de los drechos llaborales de les emplegaes de Gerusia

La privatización del Serviciu d’Atención a Domiciliu, comu lleven denunciando va meses les sos trabayaores, implica un apioramientu del serviciu ya una precarización xabaz de les condiciones llaborales.

Esta precarización aporta davezu a situaciones d’abusu ya illegalidá, comu ye’l casu del impagu d’atrasos y estres que tan careciendo les emplegaes de la socontrata Gerusia, empresa qu’amás nun aplicó entá la perceutiva xubía salarial llegalmente reconocía. Les fuelgues, protestes y tamién les sanciones por parte la empresa sucédense de magar l’añu 2019, cuando reclamaben les xubíes salariales non aplicaes, intensificándose nel 2020 ante l’impagu de les nómines. La falta de rempuesta por parte’l Gobiernu d’Asturies y de los Conceyos que contraten a estes empreses ante los sos desmanes permíte que se repitan situaciones que dexen a les trabayaore y a les sos families albentestate.

“Nesti casu toco-yos a les compañeres  de Gerusia, pero pue pasanos a toes, ye una demostración de lo qu’ocurre cuandu privatices un serviciu que tendría de ser 100% públicu” denuncien dende la Plataforma d’Ausiliares del SAD Asturies, convocantes d’esti manifestamientu que tendrá llugar el díe 29 de magar les cincu la tardi, con salida delantre la sede de Gerusia (cai Martinez Marina 16, n’Uviéu) y qu’empobinará a la Xunta del Gobiernu, onde desixirán la implicación nel conflictu de los poderes públicos y la remunicipalización d’un serviciu qu’enxamás nun debiere de ser priváu.

Redaición InfoAsturies

This work is licensed under a Creative Commons Attribution 4.0 International License.