Estrénase’l primer xuegu d’ordenaor concebíu y desendolcáu n’asturianu

  • 27 Avientu, 2022

Por agora namás que tienen acesu al vidiuxuegu los mecenes que sofitaron la so campaña de crowdfunding, nun mes cuéntase que se subirá a plataformes dixitales, dende InfoAsturies taremos sollertes p’avisavos

Nun ye una torna, nun ye una copia, Tiempu de Lleendes, el primer CRPG n’asturianu, desendolcóse nesa llingua dende’l menutu cero de la so hestoria, lo que lu fai únicu y esperemos que pioneru. Creáu por Adrián Carbayales col programa RPG Maker MV, esti  vidiuxuegu ponte nel pelleyu d’una deprendiz de bruxa, Xandria, que tien de salir de Polazul, el so pueblu, alcontrándose con aventures asgaya a les que tendrá d’enfrentase cola so maxa ya’l gabitu d’un collaciu col envís de salvar el mundu de los planes de Zargos, el malváu rei del inframundu.

El xuegu, con un diseñu que remembra les aventures gráfiques de los años 90, permite garrar decisiones que van camudar el so desendolcu, comu’l tipu de maxa que se va remanar o quien va ser el compañeru, pente otres munches, lo que posibilita estremaos finales pa la hestoria y fae más prestoso xugar con elli delles vegaes.

La emportancia d’esti xuegu ye múltiple, per un lláu la so conceición y desendolcu cien por cien asturianos permite que treslluzcan nelli non solo la llingua, sinón pingarates del calter y la cultura asturiana, humor llariegu, guiños a vezos mui nuesos y la presencia de la mitoloxía asturiana entemecía con influyencia de los RPG xaponeses. Pel otru, avérase a estayes moces de la población y entama a enllenar l’emportante ermu de la presencia del asturianu nel arruelu xuvenil y dixital.

Esti Nadal el  xuegu ta disponible namás pa los mecenes, pronto van haber posibilidá de mercalu’n plataformes de distribución dixital.  Si queréis saber más podéis ver un avance del xuegu, calcando equí, o tamién el gameplay de la demostración que ficieron en Todas Gamers, calcando equí.

Alberto Rodríguez

 

This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies