El 2,8% de la dinidá

  • 26 Avientu, 2022

El Instituto Nacional de Estadística español fai una encuesta n’Asturies ente cuyes entrugues ta la de la llingua na que se fala. Ente les rempuestes posibles ta l’español –por supuestu- y otres llingües comu l’inglés y el francés… pero escaécense del asturianu. Pesia ello un 2,8% de los asturianos encuestaos dexaron afitao que la so llingua ye l’asturianu. Un 2,8%, el 2’8% de la dinidá

La esculpa del escaezu del asturianu ye que nun ye una llingua oficial n’Asturies ¿el francés y l’inglés sí?. La manipulación mediática descarada y desaxerada, presentando l’asturianu como daqué marxinal y a puntu esaniciase… los medios de comunicación asturianos eviten desplicar que l’asturianu nun apaecía ente les rempuestes posibles. Normal, esperar otra cosa de La Nueva España, ye como creyer na Oficialidá que mos diba trayer Barbón.

L’escluyir l’asturianu dientru les posibles rempuestes, supón una normalización negacionista de la esistencia de la nuesa llingua nacional, y ye un pasu más del esiliu internu al que quien condergamos. Nun esistimos, nun cuntamos. Ñégasemos la nuesa rialidá, la nuesa propia esistencia, pretenden aisllamos, presentamos como flecos perdíos de la verdá con mayúscules… ellaborar el rellatu d’Asturies como si nun esistieren asturianos y asturianes, namás españoles d’Asturies.

Por eso ye tan importante esi 2,8%, porque francen col discursu únicu, cola fin de la hestoria que tienen prevista pa la nuesa llingua y el nuesu país.

Hai un 2,8% de los asturianos encuestaos que nun lo dubiaron. Nun falen español, nin inglés, nin francés, falen na llingua del so país, falen n’asturianu, y lo que ye más importante, tan dimpuestos a defendelo como namás puen defendese estes coses: cola dimposición conocía y costante a reivindicase como asturianos y asturianes.

Hai otra Asturies, la que tienen tracamundiada con princeses y princesaos, la que tovía camienta n’aquello de qu’Asturies ye España; la que de verdá creyó que diba haber reconvesión minera o naval; la que mira a Madrid esperando que d’ellí vengan les soluciones y non los problemes; la qu’apuesta poles sos sucursales como si fueren a trayer daqué más que miseria pa esti país. Hai otra Asturies que tovía creye neso, que nun se da cuenta qu’Adrian Barbón nun ye otra cosa qu’un discípulu de Villa, un vendeor de fumu, un títere sumisu y servil de los sos amos de Madrid.

Hai esa Asturies a la que tenemos que dir ganando, ensiñándo-yos la rialidá que-yos ñeguen, y pa ello cuntamos con esi 2,8% d’asturianos y asturianes. El 2,8% de la dinidá.

This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies