• Portada
  • >
  • Sociedá/Llaboral
  • >
  • La Conseyería nun contempla condonar les deldes del SSB causaes polos sos erros alministrativos

La Conseyería nun contempla condonar les deldes del SSB causaes polos sos erros alministrativos

  • 16 Avientu, 2022

Dende’l mes d’Ochobre un grupu de persones afeutaes pola mala xestión del salariu social y les reclamaciones de deldes entamaron una campaña pola condonación de les deldes. Nesti tiempu recoyeron robles, ficieron tres movilizaciones a pie de cai y consiguíeron un alcuentru con Melania Álvarez, Conseyera de Drechos sociales, la Directora Xeneral de estión Paula María Álvarez y la responsable del Serviciu del Salariu Social Básicu Patricia Bernardo

N’Asturies la xestión del Ingresu Mínimu Vital (IMV) tuvo semáu de fallos, erros alministrativos y sobremanera, falta d’información dende’l principiu. La Conseyería de Drechos Sociales y Bientar del Gobiernu d’Asturies nun aparó los ingresos del SSB a los beneficiarios del Ingresu Mínimu, nin alvirtió a el perceptores de que dambos ingresos yeren incompatibles polo que, considerando qu’inclusive sumando dambos apenes se raspia’l SMI, foron munchos los que pensaron que-yos correspondía cobrar dambos, asumiendo’l doble pagu como’l so drechu y sumando los dos salarios mientres un periodu d’ente 8 y 11 meses anantes de recibir les cartes que los informaben del fin de la prestación y yos comunicaben la esistencia d’un endeldamientu que, en dellos casos, algama los 6.000 €.

La redacción de la carta, apavoriante, poca clara y acusadora, dexaba claro les graves consecuencies de la non devolución de los ingresos que l’alministración fixo por erru, lo que dexó a 14.000 persones -recordemos, yá en riesgu d’esclusión- na difícil situación de faer frente al pagu d’una delda de la que nun son culpables con unos ingresos que, nel meyor de los casos, dan pa subsistir. Per otru llau, pa considerar fechu’l pagu los afectaos non solo tendríen de faer l’ingresu dando’l so datos, sinón que teníen de faer llegar el xustificante del mesmu a la Conseyería por Rexistru, daqué que nun s’indica na carta y que puede resultar una xestión complicada, especialmente pa persones con pocu accesu a la tecnoloxía y n’unos tiempos en que la mayoría les xestiones resuélvense telemáticamente.

Casi un añu dempués la campaña pola condonación d’esta delda sigue y un grupu de persones aconceyaron con Melania Álvarez, Paula María Álvarez y Patricia Bernardo pa tresllada-yos los sos problemes y desixencies.

Nesa xunta treslladar a les responsables autonómiques los problemes relativos a la llenta actualización d’importes del salariu social, davezu acompañá de falta de contestación a les notificaciones, allegamientos y escritos de les persones. El nun haber atención presencial a los afectaos agrava la cuestión, yá que, denuncien, les cartes recibíes tán llastraes d’erros y son “indescifrables”.
Pero sobremanera tratóse la imposibilidá per parte de persones en situación de necesidá de pagar una delda d’esta magnitú, contrayía por erru alministrativu, y de les consecuencies, non solo económiques, que ta teniendo esta cuestión sobro los afectaos.

Poro desixen que se reconoza la responsabilidá de la Conseyería nel problema de les deldes xeneraes pola mala xestión del salariu social y consecuentemente se condonen estes deldes. Tamién reclamaron l’actualización del salariu social nun plazu de trés meses, estableciéndose un procesu claru, trasparente y cenciellu que puean utilizar toles persones en situación de vulnerabilidá.
Pela so parte la Conseyería d’Asuntos Sociales retrucó que yá s’ameyoró enforma nos últimos años, roblándose nuevos reglamentos, lleis de garantíes y prestaciones sociales y convenios, anque reconocen qu’hai un seriu problema de xestión, que les cartes nun son clares y los allegamientos nun tán siendo respondíos, asumiendo amás que nun hai coordinación ente la xestión del IMV y el SSB.
Dende la conseyería nun s’asume nenguna responsabilidá nin se valora condonar les deldes del salariu social, culpando a toos (servicios sociales municipales, responsables del IMV y sobremanera, perceptores) menos a si mesmos del caos producíu.

Redaición InfoAsturies

This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies