L’espectáculu, qu’inclui un repertoriu compuestu a costafecha pal Intercélticu de Lorient, rinde homenaxe al artista desapaecíu Elías García y a toles persones que nos dexaron nestos últimos años de pandemia

El conciertu va facese’l sábadu 3 d’avientu, a les 20:30 hores, nel Teatru de la Llaboral – Xixón y nelli Mapi Quintana va tar acompañada nel escenariu por César Latorre (pianu), Sonia Cartón (voz y sintetizador), María Sanmiguel (voz y violín), Thomas Welvaadt (trompeta) y Juanjo Díaz (percusión). L’arte visual de Marina Durany tamién va tener una relevancia especial nesti conciertu, completando estéticamente la escena y representando visualmente les emociones que tresmiten los cantares de Música pa tornar páxaros.

Ye la primer vuelta que va presentase esta obra musical n’Asturies, ya que’l so repertoriu foi compuestu a costafecha pal conciertu inaugural del Festival Intercélticu de Lorient, onde Asturies foi esti añu la convidada d’honor. Van sentise melodíes asturianes a trés voces, onde l’harmonía va llevar al públicu a dómines más modernes y estétiques, inspiraes principalmente na música impresionista y el jazz. Tamién va haber espaciu pa la improvisación, tanto solista como en grupu. El repertoriu contién principalmente música orixinal, anque tamién hai cantares tradicionales de Ḷḷena, conceyu de la propia Mapi Quintana.

Alberto Rodríguez

.

This work is licensed under a Creative Commons Attribution 4.0 International License.