El Conceyu contra la Incineración, les asociaciones vecinales de Xove, Portuarios y El Muselín y la Federación d’Asociaciones Vecinales de la Zona Urbana de Xixón (FAV) convoquen una concentración contra la istalación d’una planta de tratamientu de residuos plásticos n’El Musel
Xixón precisa puestos de trabayu, pero nun pueden crease a costa de les vides de los ciudadanos, denuncien los vecinos de los barrios d’El Muselín, Portuarios, Xove, Natahoyo y La Calzada, principales afeutaos pola futura actividá de la planta que la multinacional Preco quier istalar a cerca d’un km de los sos llares.
Son barrios ya fuertemente afeutaos pola contaminación que ven planear sobre ellos la solombra d’un complexu de 38.000 metros cuadraos nos que se procesarán plásticos, una actividá que, incluso nel improbable casu de que se ficiere de la meyor manera posible, xenera peligrosos gases. Esmolez especialmente la emisión de diosines y furanos, que son de los mayores neurotósicos que se conocen.
Nun quieren que s’escaeza que Preco vien a Xixón de la man del Istitutu pal Desendolcu Económicu del Principáu d’Asturies, Idepa, ello ye, de la man del gobiernu del PSOE y d’Adrián Barbón, a quien acusen de dispreciar la salú de los y les xixoneses.
Por tou ello convoquen una concentración esti sábadu 26 de payares a les doce y media al pie de la Casa del Mar, mui cerca del llugar onde ta previsto istalar la planta de tratamientu.
Alberto Rodríguez
This work is licensed under a Creative Commons Attribution 4.0 International License.
