Andecha Astur considera que nel fondu esta decisión ta na llinia d’actuación real del gobiernu de Barbón, entantu que CSI Educación desixe a la Conseyería que de un pasu atrás y convierta en real y permanente el Plan Pilotu Esperimental de Promoción del Usu del Asturianu nel que participaben dellos colexos
La conseyera d’Educación d’Asturies, Lydia Espina, vien d’afirmar na Xunta Xeneral que’l Gobiernu nun va volver a trabayar nel Plan Pilotu Esperimental de Promoción del Usu del Asturianu. Esi plan, que lleva 6 años furrulando con ésitu en dellos centros educativos d’Asturies, demuestra que l’asturianu ye un idioma perfechamente válidu como mediu pa tresmitir conocencia y los mesmos responsables de l’alministración encargaos de la so supervisión coinciden en que los sos resultaos son positivos, tantu académicamente comu en meyora de l’autoestima llingüística -y poro personal- de los escolinos participantes nel plan pilotu.
P’Andecha Astur, eso ye precisamente lo qu’estorba, ya’l so desaniciu nun ye sinón otra amuesa de la vraera cara del PSOE y d’Adrián Barbón, qu’aportó a la presidencia gracies a los votos del asturianu pero que non solo nun declaró, comu prometiere nel so programa, la oficialidá, sinón que, a nivel educativu, sigui perxudicando tanto a escolinos comu docentes d’asturianu, permitiendo que nun esista la especialidá docente y amenorgando amás les hores dedicaes a la asignatura na ESO. “Non en baldre l’actual PSOE ye heriederu de quienes con más rixu persiguieron y castigaron a los asturfalantes demientres décades”.
Dende la seición sindical d’Educación de la Corriente Sindical d’Izquierda amuesen tamién el so refugu énte estes declaraciones, destacando que’l sistema educativu ye una de les ferramientes básiques pa protexer y normalizar una llingua en peligru de desapaecer polo que “la Conseyería tendría de caminar nesta direición y nun dar pasos atrás”. El sindicatu desixe un cambiu na forma d’actuar de la Conseyería d’Educación y del Gobiernu al completu, tratando a les llingües d’Asturies cola dignidá que merecen.
Llucía F. Marqués
This work is licensed under a Creative Commons Attribution 4.0 International License.
