El Centru Social de Villamayor (Antigües Escueles) programó pal prósimu vienres, 11 de payares, la conferencia “Llabres ornamentales nel conceyu de Piloña: reflexón en redol al orixe y posible significáu de la plástica xeométrica mientres la Prehistoria y Antigüedá d’Asturies”
Va ser pronunciada por Ángel Villa Valdés, arqueólogu especializáu nel estudiu de la Edá del Fierro y más temprana romanización que forma parte de la plantiya del Muséu Arqueolóxicu d’Asturies.
Na so presentación abordaránse dellos argumentos que permiten defender que los motivos comunes na plástica protohistórica son portadores d’un significáu específicu y relevante que foi compartíu polos pueblos prerromanos de la fastera cantábrica ocidental. Un códigu que subsistiría en dómina altoimperial integráu n’espresiones culturales romanes como la epigrafía.
L’actu iscríbese nel programa de conferencies que sol títulu “El Camín de los Santuarios” patrocina la Conseyería de Cultura, Política Llingüística y Turismu del Principáu d’Asturies so la dirección y coordinación d’Andrés Martínez Vega, Subdireutor del Real Institutu d’Estudios Asturianos.
Redaición InfoAsturies
This work is licensed under a Creative Commons Attribution 4.0 International License.
