Pente otres cuestiones, la organización critica que la cartelería inora’l topónimu tradicional
Iniciativa pol Asturianu presentó una reclamación al Conceyu de Xixón pa que l’asturianu tea presente nes pantalles informatives instalaes recién nos aparcaderos del estadiu municipal El Molinón-Enrique Castro Quini. Los paneles electrónicos nuevos instaláronse hai delles selmanes y yá tan en furrulamientu.
La organización de reivindicación llingüística llamenta l’ausencia del asturianu nunos elementos nos que la presencia del idioma nun xeneraría costu adicional, sinón que los mensaxes podríen intercalase y apurrise de forma billingüe. Aprovechando l’usu de la electrónica na cartelería, sedría bien interesante la presencia del asturianu pola so visibilidá de les informaciones (díes, hores…).
Amás, reclamen l’usu de la toponimia oficial nestes pantalles, onde namás ta presente’l topónimu ‘Gijón’. D’esta manera, el Conceyu de Xixón inora la toponimia oficial, que recueye dende setiembre de 2006 la forma tradicional ‘Xixón’.
This work is licensed under a Creative Commons Attribution 4.0 International License.
