Mañana los republicanos asturianos tornarán amosar la so refuga a los reis d’España, a pocos metros del Teatru onde les sos maxestaes tarán faciendo entrega de los Premios Principiegos. La concentración ta convocada de magar les 5 la tardi y continuará demientres tola entrega de premios, faciéndose sentir perriba les barreres policiales que, comu cada añu, tratarán de facer lo menos visible la presencia de los manifestantes
Andecha Astur tilda de “Humildantes” a los Premios Princesa, que tendrán llugar esti vienres, 28 d’ochobre de 2022 y “colos que se pretende dar puxu y credibilidá a la monaquía española n’Asturies, al tiempu que blanquiar qu’esta casa rial ocupe poder sólo por ser heredera del franquismu”. Poro, llama a participar na concentración que tendrá llugar mañana vienres 28 d’ochobre, de magar les 17:30 hores na Plaza la Escandalera d’Uviéu, de manera que’l recibimientu a los reis d’España na entrega de los Premios Principiegos se torne n’espeyu de la refuga a la monarquía y a los Borbones que ye, como amuesen les encuestes, mayoritariu ente’l pueblu asturianu.
Añu tres añu los asturianos amuesen nesta concentración la so refuga a ser súbditos de la monarquía española, reclamando p’Asturies la República y denunciando los premios Principiegos como un torpe intentu de llavar la imaxen de la Casa Real, entamaos por una fundación corrupta, el patronatu de la Fundación Princesa, onde tan les grandes fortunes d’España y dalgunos de los más direutos responsables de la crisis económica que carecemos.
Añu tres añu, tamién, la policía allonxa a los manifestantes del pasu de los premiaos y los medios de comunicación oficiales tapecen esta protesta, queriendo dar una imaxen de sumisión del pueblu asturianu. Ye poro importante ser los más posibles pa facese sentir perriba la barrera policial y que nun puean obviar la voz del pueblu asturianu.
La cita ye esti vienres 28 d’ochobre, dende les 17:30 na Plaza La Escandalera (Uviéu)
This work is licensed under a Creative Commons Attribution 4.0 International License.
