Miembros de cuatro sindicatos fadrán un analís en fondura de les razones de l’actual crisis y los caminos pa enfrentase a ella dende una perspeutiva de clas
Entender la crisis, inflación, guerra, emerxencia climática, organizar la rempuesta. Esi ye’l títulu completu de la reflexón propuesta por Anticapitalistes nel alcuentru, que tendrá llugar mañana 21 d’ochobre na Casa Sindical de Xixón de magar les siete la tardi.
Nella tarán representaos cuatro sindicatos, la CGT, con Fernando Fonticiella, el sindicatu d’ensiñantes SUATEA, coles aportaciones de Tino Burgos, CCOO cola presencia de Silvia Salamanca y CSI, organización de la que participarán dos delegaos sindicales, Paula González, del comité d’empresa de Duro Felguera, y Juan García Alonso, qu’amás pertenez, igual que Silvia Salamanca, al coleutivu Anticapitalistes d’Asturies.
L’envís d’esti conceyu ye valorar los caminos que traxeron a esta crisis, calibrar la situación dende puntos de vista de clas y guetar medios de rempuesta ante’l machaque que tan viviendo les clases populares cola esculpia les socesives crisis.
Redaición InfoAsturies
This work is licensed under a Creative Commons Attribution 4.0 International License.
