SUATEA denuncia la sistemática vulneración de los derechos llingüísticos de los escolinos

  • 6 Ochobre, 2022

Un mes depués d’entamar el cursu escolar, los colexos mierenses Aniceto Sela y Santiago Apóstol y la escuela de Grandas de Salime siguen ensin dotación de profesoráu de llingua p’atender a los escolinos que demanden recibir estes enseñances, una situación recurrente nos caberos años

Son dos los colexos mierenses nos que se da esti problema. Nel 2020 yá se recoyó la denuncia de que nel colexu Aniceto Sela, depués de más de dos meses d’entamáu’l cursu, siguíen ensin profesoráu d’Asturianu p’atender a parte de los escolinos de Primaria y a la totalidá de los d’Educación Infantil, una situación que s’allargó tres meses.Esti cursu repítese la falta d’atención d’esta demanda educativa.

Pel so llau, nel colexu Santiago Apóstol, suprimióse la enseñanza d’Asturianu na (EI) tol cursu pasáu 2021/22, magar tener impartío estes enseñances a lo llargo d’una montonera años con una demanda allegada al 100% del alumnáu. Esti cursu 2022/23 siguen pel mesmu camín: con cuasi’l 100% del alumnáu demandando l’Asturianu nun se dota con profesoráu pa impartir estos conteníos.

Siguen tovía ensin recibir profesoráu pa impartir l’asignatura d’Eo-naviego na escuela de Grandas de Salime y nel IES de Navia cubrióse’l puestu la selmana pasada.

SUATEA recalca qu’esta forma d’actuar de la Conseyería d’Educación, nun dotando del profesoráu especialista necesario p’atender la demanda d’estes enseñances, ye sistemática, va xeneralízándose añu tres añu, y ye contraria a drechu. Atiende a criterios discriminatorios ya economicistes, retayando gastu a costa de los drechos de la reciella. Amás, vulnera dafechu la llei d’Usu de 1998 que nel so artículu 10.1 diz: “Nel exerciciu de les sos competencies, el Principáu d’Asturies tien de garantizar l’enseñu del bable/asturianu en tolos niveles y graos, respetando sicasí la voluntariedá del so aprendimientu.

Tampoco atiende al mandáu del Estatutu Autonomía d’Asturies, que nel so artículu 4, nel so puntu 2 faciendo refencia al asturianu recueye “ …promoverase’l so usu, la so difusión nos medios de comunicación y la so enseñanza…

“Tan sistemáticu ye’l frayamientu de los nuesos derechos llingüísticos y l’incumplimientu de les nueses lleis, que l’acabante espublizar currículu d’EI nun recueye dengún conteníu referíu a les nuestres llingües patrimoniales. Esta ausencia curricular supón amás una ruptura drástica na transición de la llingua materno-ambiental a la institucional-escolar con bultables consecuencies negatives nel procesu de deprendimientu, nel procesu de recuperación llingüística y na falta de continuidá nos conteníos ente la etapa EI y Primaria” declaren dende SUATEA, sindicatu d’ensiñantes que tien interpuesta demanda xudicial contra’l “Decretu 56/2022, de 5 de agostu, pol que se regula la ordenación y s’afita’l currículu de la educación Infantil n’Asturies”  n’espera de ser atendía pola Conseyería d’Educación.

Redaición InfoAsturies


This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies