El programa Xplore Technology Awards 2023, de la multinacional alemana Phoenix Contact, premia a estudiantes de secundaria y universitarios, aprendices, istructores, fundaores “y persones polo xeneral que non solo quieren esperimentar el futuru, sinón tamién da-y forma”

Nesta edición de los premios fueron escoyíos un total de cuatro proyeutos de la Universidá d’Uviéu, venceyaos a la innovación y caltenibilidá nos ámbitos de la digitalización teunolóxica, movilidá llétrica, xestión enerxética y l’internet de les coses. Ello convierte a la UNIOVI na istitución académica europea con más proyeutos escoyíos.

Un de los équipos que desendolcarán estos proyeutos ye’l Wolfast Uniovi Racing Team, que va diseñar una batería modular na categoría de movilidá llétrica. Los profesores ya investigadores de l’Ária de Proyeutos d’Inxeniería, desendolcarán un proyeutu venceyáu a la xeneración d’enerxíes llimpies nel ámbitu de la digitalización; l’equipu de la Cátedra Xixón Smart Cities va ellaborar un sistema avanzáu de xestión d’activos enerxéticos nel apartáu de tecnoloxíes dixitales y pa finar, na categoría de factoría intelixente, l’Ária d’Inxeniería de Sistemes y Automática va crear una máquina automatizada destinada a la ellaboración de texíos y recreación d’obres d’arte.

Aparte d’ellos, na categoría d’educación preséntense otros dos proyeutos, per un llau’l Tech Education Metaverse, pa  crear un metaverso de formación escalable por aciu l’usu de la realidá virtual y pel otru, presentáu pol colexu Codema de Xixón,  y-com, un conteneor intelixente pal reciclax de borrafes.

Los 20 meyores proyectos de too el mundu van allegar a Alemaña pa participar na gran final, que va tener llugar en 2023, coincidiendo col 100 aniversariu de Phoenix Contact.

Redaición InfoAsturies

This work is licensed under a Creative Commons Attribution 4.0 International License.