Nestos discos alcontramos collaboradores del altor d’ Ismael Serrano, Nacho Vegas o el “Coru Mineru de Turón”
Bones noticies pa la música asturiana, tenemos nos cartelos otra vuelta a ún de los cantautores más respetaos del panorama asturianu y estatal.  Esti fin de selmana salieron  a la venta los trabayos séptimu y octavu d’Alfredo González, “La insistencia” (Carcajada Records) y “Asuntu de fe” (Algamar Producciones).
Falamos de dos EP’s, ún en castellán y otru n’ asturianu, que fueron adelantándose con
dellos singles dende’l febreru pasáu.”La insistencia”, producíu por Pachi “Alis”, ye un discu con cuatro canciones de pop rellumante, ente les qu’atopamos lo que ye yá un clásicu pal públicu d’ Alfredo,
“Corredera”, un single nel que collabora Ismael Serrano y que, en malapenes tres selmanes, yá dexó atrás les 20.000 reproducciones.
Nel casu de “Asuntu de fe”, producíu por Sergio Rodríguez “TUTU”, ye un EP formáu por cuatro cantares intimistes al empar que contundentes, d’ente los que podíemos escoyer el corte “Si te pregunten por mi”, que tien d’invitaos a Nacho Vegas y al Coru Mineru de Turón.
L’últimu videoclip que s’edita xunto a la salida d’estos trabayos ye’l de “Un océano entero”, una xoya visual dirixida por Carlos Navarro na qu’Alfredo cuasi desapaez en favor de la conocida cantante asturiana Silvia Quesada, amosando namás partes del so cuerpu en primer planu.

This work is licensed under a Creative Commons Attribution 4.0 International License.