El Muséu del Pueblu d’Asturies aconceyará esti sábadu a les families qu’apuesten pol asturianu na educación de los sos fíos, nuna xornada d’arruelu, esporte y música pensada pa los más piqueños de la casa
L’Asociación Cultural Reciella, Families pol Asturianu, vien cellebrando de magar l’añu 2.013 esta folixa abierta a tol que quiera averase y na que toles actividaes tienen como llingua vehicular esclusivamente l’asturianu.
La folixa entama a les once y a lo llargo’l díi, fasta les siete la tardi, sucederánse talleres, pa tolos gustos y estremaes edaes. Tan programaos dende los xuegos más tradicionales fasta desfiles de moda o talleres de Tiktok y Cosplay.
L’esporte, comu siempres, tará perpresente, coles Olimpiaes Asturianes, l’axedrez ya’l valtu, y la música acompangará tola xornada, con conciertos, baille y la novedá más esperada de la edición, una pinchada didáutica de música xamaicana entamá polos responsables del programa “Ximiélgalo Radio Show”, de radio Kras.
La Danza Prima rematará la xornada, xusto darréu’l conciertu d’Alfredo González, autor del tema “L’asturianu conéctate” que ye’l llema del díi y que compuso especialmente pa la ocasión.
Una xornada serondiega d’alcuentru nel que les families asturfalantes pueden esfrutar na llingua llariega y les que nun lo son pueden averase pa dir deprendiéndola.
Redaición InfoAsturies
This work is licensed under a Creative Commons Attribution 4.0 International License.
