UXT y CCOO imponen con manipulaciones y chantaxes a les trabayaores de Serviciu a Domiciliu un conveniu inxustu, depués de más d’un mes de fuelga indefinío y manifestamientos diarios, pero elles alvierten, la llucha continúa

La Plataforma d’Ausiliares del SAD n’Asturies califica de puñalada pela espalda la imposición, pola mínima y con chantaxe, d’un conveniu que nun les saca de la precariedá y que beneficia a la patronal. Los sindicatos, a los qu’acusen de “dirixentes apoltronaos” y “burócratas bien pagaos”, presentaron a votación dos propuestes “Aceutar la negociación de SASEC” o “Romper la negociación”, estremu esti caberu qu’enxamás se plantegó dende dengún seutor, ya que la negociación ye precisamente lo que se buscaba nesti conflictu. En realidá eses dos opciones traducíense misteriosamente en aceutar o refugar la propuesta de la patronal.

La manipulación complétase con votaciones espres nos cientros de díe, imposibilitando que les compañeres falaren ente sí pa esclariar lo que vraeramente taben votando y recoyendo los votos fuera de los llugares de votación, inorando cualisquier garantía democrática ya intimidando a les votantes.

Pesi a toos estos métodos mafiosos, les votaciones foron d’un 60% a favor de “aceutar el SASEC” y 40% que preferíen “romper negociaciones”, una mísere diferencia que, sicasí, oblígales a dexar la fuelga… por agora.

Les trabayaores anuncien que la so llucha continúa, que nun van aceutar les condiciones impuestes por unos sindicatos vendios qu’esgrimen l’únicu y ridículu argumentu de que “la patronal nun quería ufrir más” pa nun defender la propuesta de la plataforma. Anuncien que d’esta llucha ñacerá un sindicalismu propiu que defenda los sos intereses y les represente “Nun descansaremos fasta conseguir el nuesu oxetivu, un SAD en manes públiques qu’ufra a los sos usuarios un serviciu de calidá y a les sos trabayaores unes condiciones dignes”

Nuria Prendes

This work is licensed under a Creative Commons Attribution 4.0 International License.