Pesi a tar rellenao con sable nuevo, tapando la contaminación previa, los participantes na recoyía enllenaron delles bolses de basoria y costataron l’impautu sobro l’ecosistema de la térmica d’Aboño
La Asociación Conceyu trabayaores Paraos y en precarieda llaboral, en comuña con Seo Bird Live fexo esti domingu una llimpieza a fondu de la sablera Xivares. Lo primero que costataron al aportar foi que la playa fore rellená con una aportación estra de sable que cubría la basoria apiná demientres l’añu; basta con escarbar un pocu p’alcontrar baxo esa primera capa les traces del carbón y la basoria que quedó sepultao pol sable.
Sicasí, entá quedaba en superficie una bona cantidá de residuos que recoyeron colos sos equipos, dexando tres de si una sablera aparentemente llimpia, pero que, comu saben los organizaores de la llimpieza, sigui contaminá no fundamental. El depósitu de carbones continúa emporcando la sablera, pero nun ye namás eso, la contaminación térmica ye un de los fenómenos que más esmolez.
Los participantes comprebaron que la temperatura l’agua ye anómalamente alta. La contaminación térmica, denuncien, ta causada polos sistemes de refrixeración de la central termollétrica, qu’emplega agua en grandes cantidaes para enfriar el so fluyíu de procesu, devolviendo l’agua con un incrementu de temperatura d’ente cincu y quince grados “Si en Xivares ta asina, echa a ver na Ría d’Aboño, que ta más afeutá pola térmica”.
Ello acarreta graves problemes sobre tou pa la biodiversidá acuática, prevocando cambeos na composición y calidá de les agües. Un xorrecimientu de la temperatura de les agües afala l’actividá bacteriana y parasitaria, entantu enfeblez a los pexes y otros muerganismos acuáticos, que tamién pueden vese afeutaos pola falta d’osíxenu nel agua, llegando a carecer problemes de reprodución y subsistencia. Un xorrecimientu na temperatura de les agües puede, al tiempu, favorecer a poblaciones de determinaes especies, prevocando la invasión y colonización d’ecosistemes autóctonos.
Redaición InfoAsturies
This work is licensed under a Creative Commons Attribution 4.0 International License.
