L’Asturies más revindicativa tien nidio qu’Asturies tien per dellantre un futuru meyor que’l que mos debuxen, si mos xunimos pa lluchar por ello. “Otra Asturies ye posible”
La concentración. que tendrá llugar mañana a les doce a les puertes de la Xunta Xeneral, ta convocá baxo’l llema “Otra Asturies ye posible” recalcando la necesidá de defender otra Asturies que respuenda a los drechos y necesidaes de los asturianoscomo pueblu y como presones.
Les seies organizaciones que llamen a salir a la cai destaquen pol so compromisu por Asturies y la so llucha d’años n’estremaes estayes polos drechos del pueblu asturianu, pero alcordaron nun incluyir nomes nos cartelos pa facer asina más inclusivu’l aconceyamientu, afalar a toles persones a participar, avanzando nel enfotu de xenerar un frente común asturianu y d’izquierda “que permita ufrir al pueblu asturianu una alternativa viable y tresformadora socialmente, precisamente p’avanzar nuna Asturies onde les asturianes y asturianos puedan vivir con dignidá, siendo dueños y protagonistes del so destín en llibertá y democracia” .
Los organizaores afalen a tola población d’Asturies a superar desenfotos y allonxase d’actos con conteníu relixosu, folixeru o ermu de conteníu y averase a Uviéu y “contribuyir a dar puxu a l’Asturies roxa, l’Asturies verdi, l’Asturies violeta, l’Asturies multicollor que ye posible y que queremos pal nuesu futuru inmediatu. Pa revitalizar esa Asturies y pa comprometemos con ella una vegá más y entá con más puxu”.
Nuria Prendes
This work is licensed under a Creative Commons Attribution 4.0 International License.
