La cancelación vien darréu la espublización de dellos tuits nos que s’acusa al grupu Gavia (propietariu de la sala) de “permitir festivales con conteníu políticu y fomentar el terrorismu” por programar esti conciertu. Nos mesmos mensaxes acusase-yos de “permitir gandalla nel llocal, drogues, pelees y puñalaes toles fines de selmana”.

Lloñe de defendese de tales acusaciones, los propietarios de la Sala Cabaré deciden cancelar el conciertu, especificando que “lo último que queremos ye xenerar polémica alrodiu d’una actuación musical”, dando la razón a los boicoteadores al insistir en que suspenden el conciertu porque “Nun facemos apoloxía de la violencia nin la fadremos”.

Los grupos afeutaos denuncien la difamación, esclariando que nun faen denguna apoloxía de violencia. Dende’l grupu ochobre, un de los afeutaos, declaren que “danos noxu pensar en qué se ta convirtiendo una ciudá como Xixón, na que se normaliza’l supremacismu d’estos grupúsculos, amparaos por un equipu de fútbol y asitiaos nuna rede d’espacios nos que se sienten seguros y medren, lo que-yos permite difamar, boicotear, amenazar y exercer la violencia con total impunidá”.

El conciertu treslládase a la Cerveceria La traviesa, L’Infiestu, y sedrá de baldre pa tolos asistentes. Les perres de les entraes anticipaes devolveránse automáticamente.