A piques d’entamar el cursu les families reclamen a l’alministración un mayor control sobre la calidá de los menús nos comedores escolares y que la comida del colexu se cocine en colexu
El preciu del comedor escolar pasó n’Asturies de ser el más baratu l’Estáu, a 3’5 € va dos años, a allugase pente los más caros, a 5’82 euros al día -1’32€ más caro de lo que cuesta la xinta nel Congresu los Diputaos-. Ello nun implica una meyora na calidá del serviciu, ya que les empreses contrataes polos colexos pa esternalizar los servicios de comedor siguen siendo les mesmes y los menús mui asemeyaos. Incluso nes escueles con cocines propies ca vegada ye más avezao la subcontratación y esternalización del menú escolar.
Teóricamente, los menús de los colexos, ellaboraos por nueve empreses de catering estremaes, afáense a la “Estratexa Naos pa la nutrición, actividá física y prevención de la obesidá”, que desixe unes cantidaes mínimes de carne y pexe fresco dos díes a la selmana, fruta cuatro díes, pasta y arroz, con productos que tienen de presentar unes condiciones mínimes garantizaes al traviés d’ispeciones sospresa.
Sicasí, les families que dependen -por cuestiones d’economía o de conciliación familiar- de los comedores escolares saben bien a que s’enfrenten los sos fios na mayoría de los coles. Los alimentos vienen ultraconxelaos, non pasteurizaos, crudos, non cocinaos n’orixe como desixe’l pliegu, escasos raspiando la miseria (nun hai fruta pa toos, pártense hamburgueses a medies…), en condiciones d’almacenamientu vergoñoses, con tastos estraños, enllenos de conservantes pa qu’aguanten lo que faiga falta, sírvese davezu mal desxelao, el pexe acostuma ser panga o barrites, abúsase de los rebozaos y de la pasta…
L’atención nos comedores por parte’l personal, tamién esternu les más de les vegaes, aveza dexar muncho que deseyar, trabayaores en precario ensin formación pa tratar colos menores.
Sicasí, esa situación, dicen les asociaciones de pas y mas, podría meyorar cenciellamente dexando d’esternalizar el serviciu y cocinando les xintes nel mesmu colexu, evitando la preparación industrial, los tresllaos y la política de masimización de beneficios. Con ello, amás, podríen consumise productos de prosimidá y contratase nes cocines y comedores a persones cercanes al colexu, beneficiando a la comunidá y non a empreses ayenes, daqué especialmente importante en zones rurales nes que ye tan necesaria la creación de puestos de trabayu.
Otra emportante demanda ye que s’ufierte’l comedor escolar tamién nos cientros d’educación secundaria, ya que son miles les families que dependen d’esti serviciu pa dar a los sos fios una xinta caliente, que tien más de tres mil usuarios becaos namás en Xixón.
Llucía F. Marqués
This work is licensed under a Creative Commons Attribution 4.0 International License.
