• Portada
  • >
  • Sociedá/Llaboral
  • >
  • Entrevista a Felix Redondo (Just Eat) y Alberto Alonso (Glovo) cuando se cumple un añu de retrasu na aplicación de la Llei Rider

Entrevista a Felix Redondo (Just Eat) y Alberto Alonso (Glovo) cuando se cumple un añu de retrasu na aplicación de la Llei Rider

  • 12 Agostu, 2022

Güei fae esautamente un añu dende que tendría d’entrar en vigor la cacarexada Llei Rider; sicasí, incúmplese dafechu.” La señora ministra nun ta faciendo ná, ná de ná, pa que se cumpla la so propia llei”

Entrevistamos a Félix Redondo, responsable de la Seición Sindical de la CSI’n Just Eat, y a Alberto Alonso Beunza, Delegáu Sindical de la CSI en Glovo, pa que mos falen sol seutor y les sos empreses.

  • El trabayu comu rider nun ye un oficiu tradicional. ¿En qué seutor llaboral tais encuadraos, qué conveniu regula’l vuesu llabor?

Los trabayaores de Glovo nun tamos cubiertos por nengún conveniu, por nengún. Increyible, ¿eh?, pero cierto. Pa la nuesa opinión tendría de ser el conveniu de Tresporte o’l d’Hostelería’l que regulare’l nuesu seutor. Los trabayaores de Just Eat defendemos que seya’l conveniu d’Hostelería, que yá se mos tien oficialmente reconocíu, anque nun se cumpla.

 

  • Los riders sois unos trabayaores mui especiales, ponéis un vehículu propiu al sirviciu la empresa. ¿En qué condiciones trabayáis col vuesu coche, moto… en materia d’acidentes, averíes, combustible…?

Puf, les condiciones son tercermundistes. Los riders tenemos de pagar les averíes y el combustible del nuesu vehículu. Y tenemos que facemos cargu de lo que-y pase a la nuesa ferramienta de trabayu, que ye’l nuesu vehículu puestu al sirviciu d’una empresa privá.

 

  • ¿Just Eat y Glovo traten de forma igual a los sos trabayaores, prautiquen un tratu desigual, aliten la competencia ente vosotros…?

Les dos empreses tienen una carauterística común: costantemente intenten dividir al so colleutivu trabayaores y, por supuestu, aliten la competencia ente nós. Asina, por exemplu, en Glovo hai un multiplicaor: un tantu por cientu que fixa’l repartior sol preciu del pidíu, esi porcentas ye un ingresu pal trabayaor. Hai tiempu esi multiplicaor diba del 0’70 al 1’30%, decidiendo ca rider qué porcentax fixaba. Llueu consiguióse que’l multiplicaor tuviere ente’l 1’00 y el 1’30%. Pero eso ye sólo en teoría, porque Glovo decidió unillateralmente y comunicó de mou estraoficial a los riders que si fixen más del 1% comu multiplicaor dexen de llega-yos encargos de repartu. Lo mesmo pasa con otru asuntu: si un trabayaor de Glovo nun ta disponible pa los repartos nocherniegos de sábados y domingos, automáticamente y de forma “misteriosa” dexen de llega-y pidíos pa repartir. Curioso, ¿eh?

 

  • Nes condiciones d’anguañu, ¿consideráis que trabayar comu rider aseméyase más a una categoría llaboral normalizá o a un formatu de precariedá nel mercáu llaboral?

En Glovo hai muncha precariedá. Trabayamos por pidíos a 1’80 euros la entrega.

¿Cómu se pue calificar eso si nun ye comu precariedá? Tamién en Just Eat hai precariedá abondo. Y lo pior ye qu’esta situación llamentable ta consintía pol propiu Gobiernu, que permite que nun se tea cumpliendo la conocía comu Llei Riders, una llei que s’aprebó xustamente hai un añucon 195 votos a favor nel Congresu los Diputaos.Falamos del Rial Decretu-llei 9/2021, de 11 de mayu, pol que se camuda’l testu refundíu de la Llei del Estatutu los Trabayaores, aprebáu pol Rial Decretu Llexisllativu 2/2015, de 23 d’ochobre, pa garantizar los drechos llaborales de les presones dedicaes al repartu nel ámbetu de plataformes dixitales. Espublizóse nel BOE n 113, del miércoles, 12 de mayu de 2021.

 

  • ¿Cómu valoráis la conocía comu Llei Riders: ye o non un avance, cúmplese, fálta-y daqué…?

Bono, tanto los trabayaores de Glovo comu los de Just Eat consideramos que les lleis tán pa cumpliles y non pa que’l Gobiernu y les empreses se les salten. La Llei Riders espublizóse nel BOE el 12 de mayu de 2021; pos debería tar cumpliéndose dende’l 12 d’agostu d’esi mesmu añu. Sicasí, incúmplese dafechu. La señora ministra nun ta faciendo ná, ná de ná, pa que se cumpla la so propia llei. Y esa complicidá coles empreses ta poniéndomos a los trabayaores nuna situación de precariedá más grave que nunca, tanto en Glovo comu en Just Eat. Esto va de mal a pior.

 

  • ¿Cuáles son les vueses vindicaciones llaborales más importantes?

En Glovo la nuesa prioridá ye, ensin dulda, que s’entame a cumplir la Llei Riders. Pa los trabayaores de Just Eat tamién, pero tán más centraos en desixir que se cumpla’l conveniu que correspuende al so seutor, que ye’l d’Hostelería, non el de Mensaxería a pie o cualisquier otru que-y peteza a la empresa.

 

  • En Glovo y Just Eat¿podéis exercer les fonciones y los drechos sindicales con llibertá o topáis torgues, menacies, represión…?

¿Llibertá sindical? ¡Qué, va! Vamos, hom… Nun podemos exercer los nuesos drechos sindicales. Pervese col exemplu clarísimu d’Aitor Galindo y Félix Redondo, que foron espulsaos de la empresa por reclamar los drechos colleutivos de los trabayaores, por reclamar el conveniu y más coses. Esti dispidu foi declaráu illegal nel Xulgáu de Xixón, pero la empresa recurrió al Tribunal Superior de Xusticia; y asina tamos, a la espera la sentencia pal mes de setiembre.

 

  • ¿Qué faen pol seutor los sindicatos españoles, comu UGT o CCOO?

Sólo una cosa: vendemos. Lliteralmente. Porque nun faen ná por nós. Amás, UGT y CCOO roblaron un conveniu d’Hostelería a nivel estatal cola empresa Just Eat, pero tán permitiendo que la empresa lu imcumpla. Y, nel casu Glovo, CCOO y UGT aconceyáronse cola ministra cuandu se taba faciendo la Llei Riders y llueu yá nun fexeron gota más polos trabayaores d’esta empresa.

This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies