Les coses nun camudaron muncho dende que l’añu pasáu presentaren ante la Xunta Xeneral la so propuesta de Llei de Turismu Caltenible, inorada pol executivu asturianu

Caravanes inacabables, sableres imprauticables, acidentes causaos por entrar nel monte ensin conocimientu del mesmu, pisapraos que dificulten el trabayu a la xente de los pueblos, coches aparcaos torgando’l pasu, portielles abiertes y ganao perdío, ayalgues hestóriques y naturales estrozaes ensin remediu… l’actual modelu turísicu asturianu ye masificáu, agresivu y descontroláu.

El que debiere ser, acordies l’analís d’Andecha Astur, un seutor clave pa completar la cadarma económica d’Asturies ye en realidad una estorbisa qu’estroza’l mediu ambiente, dificulta’l normal desendolcu de les actividaes economiques tradicionales, masifica unos servicios públicos ya de por si escasos, sube’l preciu de la vivienda en fasteres turístiques y daña la identidá llingüística y cultural d’Asturies, apurriendo a cambiu puestos de trabayu precariu y rentabilidá escasa. 

Poro, añu tres añu insisten na d’una Llei de Turismu Caltenible, que sustituya a la desfasá Llei 7/2001 de Turismu, redautada por Tini Areces hai venti años y qu’apurra soluciones pa caún de los problemes xeneraos pol actual modelu de turismu. Asina inclui, pente otres munches considerances, la necesidá de corresponsabilizar al turista cola prestación de sirvicios que se-y dan y col caltenimientu de los bienes ñaturales, hestóricos y culturales de los qu’esfruta, al traviés d’un impuestu del turismu caltenible asemeyáu al que ya esiste en dellos países europeos, una ecotasa que repercuta nes arques asturianes y de los conceyos afeutaos.

La Llei tendría de garantizar un turismu ayenu al modelu de mases, respetuosu y compatible col caltenimientu’l mediu ambiente, les actividaes tradicionales de produción y la identidá d’Asturies, asina comu colos usos y costumes de les asturianes y asturianos y que nun multiplique’l riesgu sanitariu de la población.

Otru puntu importante que siñalen, comu via de finar cola precarización llaboral asociada a la hostelería, ye’l control de les empreses del seutor col envís d’asegurar que se contraten los trabayaores respetando íntegramente la llexislación llaboral vixente, torgando la esplotación llaboral y la precariedá agora mesmo presentes en tol seutor.

Poro, recuperen el llema “Turistes, Asturies nun ta en venta”, que lleven espardiendo de magar los años noventa y entamen una campaña de vidios y visites per llugares turísticos, con pancartes y pegadielles, pa visibilizar esti problema y reclamar soluciones.

Nuria Prendes

This work is licensed under a Creative Commons Attribution 4.0 International License.