Llucía F. Marqués
Bales, peines de fúsil, trozos de granada… el botín bélicu que los rapacinos enseñen con arguyu respigaría a cualquiera menos avezáu. N’Asturies sabemos ya que los montes escuenden una memoria de llucha que pocu a pocu van soltando a la superficie, pa que les xeneraciones venideres nun escaezan fácil lo qu’equí se vivió
Los neños salten de lláu a lláu de la trinchera escavao na roca vivo a la gueta de munición. Dalgunos -pocos- tienen conocimientu fondu de la hestoria y señalen los montes, per onde venía l’enemigu, per onde se-y esperaba… ún incluso estrema les bales “esta ye d’una naranxera, mira, y esta ta ensin disparar, esi fierro ye de metralla”.
La mayoría nun tienen idega y abren muncho los güeyos, forciando al adultu a cuntar esa hestoria que munchos creen enterrao. ¿Qué día foi esa guerra? entruga el piqueñu del grupu, desconcertáu “Si la guerra ye equí, ¿onde manden a los refuxaos?”; a Rusia, decimos, y nun mos cree: los rusos son malos, dizlo la tele “¿yera contra los musulmanes o contra los rusos?” insiste otru, que nun quier creer que l’enemigu fore español.
Y asina ye comu la montaña cumple’l so propósitu perpetuador de la memoria, mientres yo nun dexo de pensar cuantes bales se dispararon equí pa que, añu tres añu, xeneración tres xeneración, los rapacinos vuelvan del monte coles manes enllenes de bales.
This work is licensed under a Creative Commons Attribution 4.0 International License.
