• Portada
  • >
  • Llingua
  • >
  • Los asturianos llaméntense de la hipocresía del presidente

Los asturianos llaméntense de la hipocresía del presidente

  • 3 Xunetu, 2022

Hipocresía y vergoña son les pallabres que más se repitieron dende que se supo que’l Presidente d’Asturies diba apaecer per Bimenes na Fiesta la Oficialidá. Una bones pasó perende y dio les nueves anuncies, los llamentos de los asturianos foron un pasu más pallá “nun mos merecemos esto”

Barbón lleva tiempu echando la caña nel ríu la llingua, a ver que pesca. Por agora, nes pasaes elleiciones pescó votos asgaya y pretende repetir xugada, seique son pocos los asturianos que nun se decataron ya del so pelligrosu xuegu. Cuestiones comu la so apaición en Bimenes, na Fiesta d’una Oficialidá qu’elli mesmu traicionó, son operaciones d’esblanquiñamientu d’imaxe y propaganda coles que pretende seguir macizando.

Pero los asturianos ya nun cuelen por ello, comu pue vese nes munches espublizaciones de twitter y facebook nes que asturianos y asturianes amuesen la so refuga a esta llamentable parodia.

Vergoñoso ver a los representantes del PSOE,los represores históricos del asturiau, de protagonistes na Fiesta de la Oficialidá en Bimenes. Los ‘asturianistes’ combayando con semeyantes míseres,blanquiándolos. Que noxu!!!40 ańos esperando a que la FSA igüase la llacería que-y fizo a la llingua asturiana y cuando sofita la oficialidá básicamente la política llinguística ye peor que la Javier Fernández. Reduzse a dir a la folixa de Bimenes ya incumplir la Llei d’Usu. Nun merecemos esto” decía un usuariu de twitter que firma comu “El Ferroviariu”. Seique elli lo resume perbién, nun ye l’únicu en falar nesi sen. “

El Secretariu Xeneral del partíu que torgó la oficialida más de40 años, na folixa pola llibertá d’esa llingua. Sángrenme los güeyos con tantu descaru” escribió Gonzalo Peláez.

Siguiendo la metáfora del pexe, Xicu Sánchez tamién lo ve claro “Echando la cucharilla pa que muerda el pexe , depués pa la saca , lo peor ye que nun ye pesca ensin muerte , con cada pexe que pica, muerre un pocu la llingua”.

Sicasí, el nivel d’indinación de los asturianos aportó entá a más alto cola anuncia de l’apertura d’una oficina pa recoyer les quexes por discriminación llingüística.

Un organismu ensin poder sancionador nel que poder arrequexar a los asturfalantes perxudicaos pola asturfobia, ensin qu’estorben n’otros despachos, un engañabobos, comu fae ver nel so tweet Sumiciu Cansaos de que lloremos peles esquines, entamen una esquina nueva pa llorar. Una oficina que como muncho tendrá valor estadísticu o pa poner un sellu de l’alministración al “barruntu” de que nun se cumple la llei. Tal como se plantega, ensin capacidá de nada, ye tirar les perres

Al paecer esta “Oficina de reclamaciones”, que paez tener muncho de muria de les llamentaciones y mui pocu de defensa de los asturfalantes, ye lo meyor que se-yos ocurre pente Barbón y Piñán pa facer cumplir la mesma llei qu’ellos mesmos lleven décades incumpliendo, una Llei d’Usu del Asturianu que ñació ya obsoleta y que nin siquier se cumple.

Un despachín nel que poder colocar a los amiguinos pa dase palmaines nos costazos y que la xente quede contento “ya lo denuncié na oficina” . Ya ta, asina quedamos contentos  y nun damos guerra.

 

Nuria Prendes

 

This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies