Les cuentes nun cuadren per denyuri, pero los economistes alvierten, n’Asturies lo pior ta por venir

Facer la compra, dicen los espertos, cuesta esti mes 200 euros más por persona que l’añu pasáu, 800 más nuna familia de 4, pero comu resulta qu’esa familia nun tien 800 euros más, nin 400, nin 200 siquiera, el resultáu ye una familia que pasa necesidaes. De fechu, les cuentes nun cuadraben ya anantes, siendo ello qu’un perceutor del SMI n’Asturies cuenta con pocu más de 250€ al mes pa comer  (elli y si la tien, la so familia); falar de “gastar 800 € más en comer por familia” implicaría la necesidá de subir un 70% el so salariu, un 17% si se trata d’una vivienda unipersonal. Nun digo ya comu queden les coses pa los perceutores del IMV colos sos, remembremos, 491,63€ mensuales.

Si resulta qu’esa familia qu’agora precisa 800 euros más ya pasaba necesidaes anante tenemos un garrapiellu xente desesperáu por colar d’Asturies a la gueta d’oportunidaes. Porque equí, cenciellamente, nun da pa vivir.

Pero nun apara ehí la cosa. Nun hai falta ser economista pa pescanciar les consecuencies de la perda de capacidá alquisitivo de la población nuna economía circular. Si nun hai perres, nun se compra más que lo xusto, y si unos nun compren, otros nun venden, los negocios, ergo, pierden rentabilidá y faen coses comu dexar d’invertir, despidir emplegaos, subsistir baxo mínimos, o presllar. Asina qu’hai más xente ensin perres y les ventes caen más entá. Cae de caxón y vióse venir dende que’l Sr. M. Rajoy pidía a los ciudadanos contención nel gastu y los sos continuadores nel poder nun fexeron por revertir el camín de los retayos.

N’Asturies paez qu’aportamos a la cume d’esi camín de magar esti branu, dicen los espertos, porque les empreses que tuvieron fasta agora aguantando parte del incrementu del coste nun van poder más y van repercutilu nel consumidor final; ello ye, que nos queden cuatro díes anantes d’otra subida xabaz de precios. Al mesmu tiempu alvierten que les perres aforraes demientres el confinamientu tan a piques d’escosase asina que va haber menos disponible pal gastu.

Comu única solución ya ensin deprender d’esperiencies recientes, nes que se vió la vulnerabilidá del seutor, apunten de nuevu al turismu comu únicu salvador. Seguimos nel sieglu pasáu, Bienveníu, Mr. Marshall.

Nuria Prendes