La movilización ye pol sistema públicu de pensiones y salú ya escontra la precariedá y la carestía de la vida

El prósimu martes 28 de xunetu tendrá llugar un manifestamientu convocáu por Pensionistes d’Asturies que, saliendo del Teatru Xovellanos fadrá un percorríu peles cais más céntriques de Xixón, aportando a les Oficines de la Seguridá Social, na Plaza’l Carme. La hora de salida sedrán les 19 hores.

La defensa del sistema públicu de pensiones ye la principal revindicación d’esta marcha, que tamién reclama que se garantice la continuidá y meyora d’un sistema públicu de salú qu’agora mesmo camina hacia la privatización ya’l desaniciu, tornándose en pocu más qu’asistencial. Pente les sos protestes, tamién la escesiva carestía de la vida que sume a la población nuna situación de precariedá incaltenible.

Seique la convocatoria parte de los pensionistes, les sos demandes abarquen al conxuntu de la población asturiana, polo que piden la participación de toos y toes na movilización.

Nuria Prendes

This work is licensed under a Creative Commons Attribution 4.0 International License.