Entamen a vese les complicaciones de tratar de dixitalizar un país ensin cuntar colos medios reales pa ello

Primero foi Xixón, cerca d’un mes pa solucionar un hackeu y entá hai dellos servicios municipales que siguen ensin interné “trabayo tirando del mio teléfonu priváu” confesaba un funcionariu va pocu a InfoAsturies.  Ayeru foi l’Alministración en pleno, rede sanitaria, educativa y xusticia incluyies. Nun ye la primer vuelta que’l sistema cuelga, pero ye la vegada que cuelga más a lo grande.  Paez ser que nun foi siquier un piratéu, sinón «un error nun códigu» de seguridá, qu’obligó a posponer consultes méliques, aparar matrícules y suspender xuicios.

El 70% del territoriu asturianu nun tien interné, la media d’edá de la población dexa nidio que la falta de formación dixital y los problemes de vista van complicar les coses, el nivel económicu de la población non siempres permite la conexión necesaria y sobre tou, nin la formación del personal nin los medios téunicos tan al altor de les circustancies.

Sicasí, insístese en dixitalizalo too y ya ye imposible realizar cualisquier trámite ensin facer, como mínimo, la cita previa por interné. La xente mayor tira de nietos cuandu pue y quien nun tien datos avérase a un chigre a robar la wi-fi. Pero cuando les coses fallen dende l’otru lláu complícase la hestoria. Nun se pue pretender vivir comu nel sieglu XXI con medios a nivel del XX.