El Congresu va esaniciar esta selmana’l trámite previu pa votar dende l’estranxeru, impuestu pol PSOE en comuña col PP nel 2010, y que desenfotaba a munchos emigrantes de participar nos comicios 

La cifra d’Asturianos con drechu a votu que moren fora d’Asturies y fora del Estáu amontóse bultablemente na cabera década, dende los 90.000 de 2011 -cuando yá s’alzaben voces d’allarma pola despoblación y la fuga de talentos- fasta los 122.559 actualizaos a 1 d’abril d’esti añu, que representen el 12,7 por cientu del censu total. La so participación nes elleiciones del 2023 pue ser decisiva. Prevése que la eliminación de los requisitos qu’enzancaben la votación, desixendo’l trámite previu de “rogar” el votu, incentive la so participación.

D’aprebase esta reforma, los ellectores van recibir nes sos cases pa les elleiciones del 2023 la documentación pa votar, d’oficiu, ensin pidimientu previu. Amás, súmase la posibilidá de la descarga telemática de les papeletes, cola que se trata d’acabar cola demoranza nes unviaes postales del material de votación. Tamién van afitase horarios de mañana y tarde n’embaxaes y consulaos y van ampliase los plazos: de trés a siete díes pal depósitu del votu n’urna y de trés a cincu pal escrutiniu.