De los 319 millones presupuestaos pa obres públiques, el Gobiernu d’Asturies namás sacó a concursu 67 proyectos, por valor de 141 millones, de los que terminó executando 16

Dempués de la noticia sobro’l baxu nivel d’execución presupuestaria n’inversiones d’infracadarmes n’Asturies, Barbón y la so vocera nel Gobiernín, Melania Álvarez, declararon que “nun tán satisfechos” coles desplicaciones del Gobiernu central, desixendo una comisión de siguimientu de les obres.
Nun delicáu exerciciu d’equilibriu, llogren llanzar un duple mensaxe. A los asturianos, cúntase-yos que Super Barbón va defendelos de tou mal “el Principado va siguir siendo desixente col Gobiernu d’España siempres que tenga de selo. Los intereses de los asturianos y les asturianes percima de cualesquier otra considerancia”. Al gobiernu español, pela so parte, asegurase-yos la so pacífica sumisión y llealtá, defendiendo “les resultancies positives que ta teniendo p’Asturies la collaboración ente dambes alministraciones en distintos frentes” (¿?).

Buciando un pocu más la cosa complícase. Esti enfurruñamientu de Barbón con l’executivu español  escuende otros datos pocu interesantes pal “Principado”: l’executivu asturianu llicitó en 2021 menos de la metá de lo previsto pa obres públiques y namás executó una cuarta parte d’esa metá.

Un informe ellaboráu pola patronal CAC-Asprocon compara los compromisos algamaos nos presupuestos autonómicos y nos planes añales de contratación cola realidá llicitada, constatando un incumplimientu total no qu’afecta al sector de construcción.De los 319 millones presupuestaos pa obres públiques, el Gobiernu namás sacó a concursu 67 proyeutos por valor de 141 millones de los que terminó executando 16. Lo poco que se licita, llaméntense les empreses constructores, acaba nun executándose, siendo asina que nun ye infrecuente que una empresa acabe refugando una obra que se-y concediera, por falta de presupuestu y materiales.

Nun foi namás la costrución la qu’escareció d’esta falta d’execución: de los 661 millones que se licitaron n’Asturies en 2021 ente toles alministraciones, hasta 237 taben nel aire al preslle del exerciciu.