Caravana de coches en sofitu a la fuelga’n Delcom

  • 23 Mayu, 2022

Los trabayaores de Delcom Operador Logístico denuncien la presión a la que tan viéndose sometíos por parte d’Amazón tres quince dies de fuelga indefinía

Va dos selmanes de magar l’entamu de la fuelga indefinía nel cientru de trabayu d’AMAZON en Meres – Siero pol dispidu de tres emplegaos, reconocios pola so participación na desixencia de meyores llaborales, dispidos que la empresa aporfia en llamar “por causes oxetives”. Dende la Estaya Sindical de la CSI de Delcom Operador Logístico S.A., quieren facer público la situación que se ta careciendo, destacando que la presión y medíes de represión vienen d’AMAZON, non de la so socontrata Delcom.

Les condiciones llaborales a les que’l xigante americanu somete a los sos trabayaores son conocíes perdayuri, polo que ya cuando se cellebró comu una gran noticia pal emplegu n’Asturies la istalación d’AMAZON en Sieru foron asgaya les voces que s’alzaron ante la creación n’Asturies de cientos de puestos de trabayu de la más estrema precariedá.

Amparaos nel so prestixu y na seguridá de que les sos illegalidaes quedarán impunes, siendo conocíu el pocu enfotu del gobiernu asturianu por defender al so pueblu de los abusos patronales, AMAZON nun dubia n’acosar direutamente al delegáu sindical, nin en retayar drechos fundamentales, comu’l d’asamblea, persiguiendo la so cellebración mesmo fuera’l cientru trabayu y fuera d’horariu llaboral y llegando al estremu de prohibir a los trabayaores d’otres socontrates que trabayen na estación cualisquier tratu colos de Delcom, con menacies de dispidos. Otra illegalidá manifiesta ye la grabación con móviles a les persones participantes nes movilizaciones, col envís d’identificales y desactivar el so acesu a les istalaciones.

Aparte, nun s’escuenden a la de menaciar, avisando de que “van ponese duros esta selmana qu’entra”, pesi a que los trabayaores nun tienen dala sanción por altercaos.

La importancia de participar nes movilizaciones de sofitu a estos trabayaores, comu la caravana de coches que saldrá güei a les 17:30, de la Casa Sindical en Xixón y del aparcamientu del antiguu Hotel La Gruta, n’Uviéu, va más allá del sofitu concretu a unos trabayaores en llucha polos sos drechos. Lo que ta en xuegu equí ye la xeneralización del sistema llaboral estauxuniense, más mafiosu y precarizaor inda de lo que tamos avezaos.

Nuria Prendes

 


This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies