Al considerar que los actos de protesta nun queden amparaos na llibertá d’espresión nin sindical el TSXA asienta un pelligrosu precedente col que s’ataca de frente’l drechu de los trabayaores a defendese

El conflictu cola Pastelería LA SUIZA parte de la denuncia d’una de les sos emplegaes, qu’ afirma que durante dos años tuvo faciendo alrodiu de 80 hores estres al mes obligatories, ensin remunerar, denegándose-y asinamesmo’l drechu a vacaciones.

Arriendes d’ello según pallabres de la trabayaora –que cuenta con un informe mélicu nel que se confirmen los abusos- les vexaciones de calter sesual yeren avezaes na pastelería, con comentarios y entrugues so la so ropa interior y menacies del tipu “si pierdes tal apuesta desnúdeste”, siendo vezu que recibiere wasaps personales, dalgunos incluso con imáxenes o insinuaciones sesuales.

Lo que finalmente llevó a la trabayaora a denunciar la so situación ante la CNT, sindicatu que llideró la so defensa, foi la denegación d’atención durante’l so embarazu, nel que llegó a sufrir dos menacies d’albuertu.

La ciudadanía, cola CNT al frente, retrucó contundentemente ante estos abusos, concentrándose delantre la pastelería y creando una páxina de sofitu “lasuizaexplota.es”, que sedríen forciaos a presllar por orde xudicial, vulnerando la llibertá d’espresión y la capacidá de llucha ante los abusos. Tres dellos meses de boicó y movilizaciones en protesta el propietariu de la Pastelería La Suiza  decidió aparar la so actividá empresarial, denunciando a dellos miembros de la CNT polos “escraches” fechos pente mayu y agostu del 2017, polo que fueron condergaos pol Xulgau de lo Penal 1 de Xixón.