Les investigaciones europees recientes demuestren que les concentraciones d’ozonu troposféricu inciden direutamente nes funciones respiratories, causando inflamación polmonar, asma y disnea. Alerten, amás, del evidente deterioru de la salú y l’aumentu de la mortalidá tres de la esposición al ozonu troposféricu a llargu plazu
Tamos avezaos a saber que Xixón, Uviéu, Llugones, incluso Avilés y les Cuenques presenten niveles de contaminación non aptos pa la salú humana; persabemos que los xixoneses carecen la mayor contaminación d’Europa. Sicasí, les esnales d’Asturies avecen salvar d’esi andaz y presentar niveles de polución muncho menos dañibles. Poro, ye una llamada d’atención importante lo que ta ocurriendo en Llanes, onde se recueyen los piores datos de contaminación del ozonu troposféricu de toa España, acordies a los datos de la estación de fondu allugada en Niembro, Llanes.
La mesma lleva dellos díes presentando valores especialmente desfavorables en base al Índiz Nacional de Calidá del Aire, espublizáu na web del Ministeriu pa la Transición Ecolóxica ya’l Retu Demográficu.
Poro dende la Coordinadora Ecoloxista desixen al Gobiernu d’Asturies que tome midies, porque la contaminación que se mide en Llanes vien del cientru d’Asturies.
L’ozonu troposféricu nun s’emite direutamente a la atmósfera, ye un contaminante secundariu que se forma a partir de reaciones fotoquímiques complexes de magar los contaminantes primarios (ósidos de nitróxenu (NO), monósidu de carbonu (CO) o metanu) en condiciones de fuerte insolación. La principal fuente d¡estos contaminantes son los tubos d’escape. El so impautu non supón namás un pelligru pa la salú humana, tamién dañen la vexetación, afeutando a los ecosistemes y acelerando l’amenorgamientu de la biodiversidá.
Llucía F. Marqués
This work is licensed under a Creative Commons Attribution 4.0 International License.
