La Plataforma ORU NON, en comuña con coleutivos profesionales, vecinales y d’otres tribes afeutaos pol proyeutu de minería de oro en Salave, convoquen una concentración el sábadu 16 d’abril a les 12:00 am nel Puertu Tapia
Cofradíes de pescaores, asociaciones de turismu y hostelería, grupos de llabraores y ganaeros,
asociaciones productores de miel, empreses de turismu activu, fundaciones ensin ánimu d’arriquecimientu, asociaciones de vecinos, grupos ecoloxistes y otres agrupaciones, convoquen a concentrase’n refuga al proyeutu mineru de Salave, en Tapia.
L’envís de la concentración ye asoleyar de forma clara y contundente el masivu rechazu na comarca al citáu proyeutu al tiempu q’aporfien nel so enfotu en decidir por si mesmos el futuru de la contorna, calteniendo la so calidá de vida, curiando’l so mediu ambiente y calteniendo les sos actividaes profesionales respetuoses col llugar.
Pidin amás que les alministraciones s’ocupen del alrodiu les Llagunes de Silva, coles figures de proteición ambiental afayaices, desendolcándose tamién planes qu’emponderen l’arqueoloxía ya hestoria de la fastera, fomentando’l turismu cultural.
Esta concentración ye si cabe más urxente tres de l’actuación llaceriosa de la empresa minera y les sos contrates nel baltu non autorizáu d’árboles autóctonos y otres estroces nel marcu la corta maerera nos Llagos de Silva. Los convocantes denuncien que la zona, fasta agora un llugar d’arruelu pa los tapiegos y visitantes, foi estrozada pola actuación de la minera, col beneplácitu de les autoridaes competentes.
Redaición InfoAsturies
This work is licensed under a Creative Commons Attribution 4.0 International License.
