Xuan Miyar gana’l concursu lliterariu sobre l’avieyamientu convocáu pola FACC (Federación Asturiana de Conceyos) con un rellatu n’asturianu
La FACC convocó’l pasáu avientu un concursu de rellatos, de fición o autobiográficos, empobinaos a persones mayores de 65 años residentes n’Asturies, cientraos nel fechu d’avieyar y-o vivir en soledá.
L’aniciativa ta enmarcada dientro’l proyectu ‘Nun me llames soledá’, realizáu en collaboración de la Conseyería de Salú y que tien como oxetivu favorecer l’avieyamientu activu y facer visible les situaciones de soledá qu’afecten a numberoses persones mayores n’Asturies. 50 obres foron presentaes al mesmu y valoraes pol xuráu, qu’aconceyó el llunes 4 d’abril y tuvo integráu pola alcaldesa de Tapia y Coordinadora de la Comisión de Comisión Servicio Sociales de FACC, Ana Vigón Suárez; el Director Xeneral de Servicios Sociales y Mayores, Joaquín Monteagudo Abeyaderos; la presidenta de l’Asociación d’Escritores d’Asturies, Esther García López; la mayestra y escritora Rosa Serdio González; y Rafael Cofiño Fernández, exdirector Xeneral de Salú Pública, espertu en salú comuñal y poeta
El primer premiu, dotáu con 500 €, foi pa una obra “El pigazu”, obra n’asturianu del xixonés Xuan Miyar Martínez, de 69 años, activista llingüísticu y collaborador habitual de medios con collaboraciones lliteraries n’asturianu. Nel relatu remembra la so mocedá entantu paez apigazar frente a la tele.
El segundu premiu recayó en María del Pilar Ortiz, de 67 años y vecina de Piloña , cola obra “La tierra habitada”; pa finar el tercer premiu foi llográu pol relatu “Boceto para un autoretrato” Juan Muñoz González, tamién de 69 años y vecín de Xixón. Al certame allegaron 50 rellatos.
L’actu d’entrega d’estos premios ta previstu que se celebre a primeros de mayu.
Redaición InfoAsturies
This work is licensed under a Creative Commons Attribution 4.0 International License.
1 Comment Already