La Korrika ye una carrera popular en defensa de la llingua vasca qu’añalmente aconceya peles cais d’Euskadi a decenes de miles de participantes. La so versión madrileña, más piquiñina, lleva años percorriendo les cais de Madrid col mesmu envís, seique na capital española son unes decenes de persones les que participen. Esti añu non.

Esta cellebración lleva décades percorriendo biañalmente la capital, ensin qu’enxamás se dieren problemes, tensiones nin molesties. El percorríu plantegáu pa la edición 2022 tinía salida na Ciudá Universitaria, xuniendo nel so itinerariu les sedes de les sos tres entidaes organizadores onde s’imparte euskera: l’ária d’Estudios Vascos de la Universidá Complutense, la Escuela Oficial de Idiomes de Jesús Maestro y la Euskal Etxea de Madrid. Sicasí, la “Junta de Chamberí” vien de denegar el permisu pa la so realización.

Podría ún entrugase comu d’endexe tien de ser un idioma faláu por 580 millones de persones pa sentise menaciau por unes decenes de corredores falando otru, o meyor dicho, cómu de feble tien de ser l’autoéstima de los sos defensores. Sicasí, dende delles asociaciones en defensa de les estremaes llingües minorizaes que conviven nel Estáu coinciden en ver un envís más políticu que llingüísticu: la imposición al traviés del idioma d’un españolismu xabaz que nun pescancia de cultures.