A dos díes de finar el plazu pal pagu del Bono Social Térmicu del 2022 los beneficiarios asturianos siguen esperando pol so ingresu; miles d’ellos entá nun recibieron l’ingresu de los dos años anteriores, pesi a tener reconocíu el drechu
El Bonu Social Térmicu ye una ayuda puesta en marcha n’ochobre de 2018 col envís de paliar la probitú enerxética y protexer a los consumidores más vulnerables.
Trátase d’una ayuda pa les families con menos recursos, que tendría de cobrase’l primer trimestre del añu, y que teóricamente cubre los gastos ocasionaos pol usu de la calefacción, l’agua caliente y la cocina, independientemente de cual seya’l sistema térmicu utilizáu. Más de 27.000 families asturianes tienen drechu, pola so situación de vulnerabilidá, a percibilu.
Estos gastos, según cálculos oficiales, cúbrense con pente 49,84 (bono básicu) y 79,84 (alta vulnerabilidá), ello ye, que col preciu de pocu más de dos bombones de butano cúbrense oficialmente los gastos de calefación, agua caliente y cocina. Les cantidaes son cuasi el duple si se pertenez a la “zona vip”, con bonos d’ente 77.46€ (básicu) y 124 (alta vulnerabilidá), pero Asturies ta escluyía d’esos territorios, seique hai otres comunidaes españoles que perciben bonos entá inferiores a los asturianos.
La llexisllación diz que’l bonu social térmicu tien de cobrase durante’l primer trimestre del añu, pero a dos díes de finalizar el plazu los beneficiarios asturianos entá nun lu percibieron. En realidá lo cierto ye que l’ayuda de los años 2020 y 2021 entá nun aportó a bona parte de los consumidores.
Sicasí, l’executivu asturianu vien d’anunciar que va amontar el so importe nun 50%. Los beneficiarios retuquen en redes “Agradeceriemos que meyor qu’amontalu nos papelos, lu pagaren.”
Redaición InfoAsturies
This work is licensed under a Creative Commons Attribution 4.0 International License.
