Los pescaores asturianos defenden un modelu llinial de repartu, considerando que toles flotes tienen los mesmos gastos d’esplotación y necesidaes, pero’l gobiernu d’España fae oyíos sordos entantu l’asturianu contribui al agraviu col so silenciu compliz

La implantación va una década d’un modelu d’asignación de cuotes de xarda en función del hestóricu de captures de cada flota perxudica xabazmente a los pescaores asturianos, que llegaron a llevar l’asuntu a los tribunales ensin que dengún gobiernu modificare de magar entós el criteriu.

L’ Asociación de Volanteros del Cantábricu Noroeste (Avocano) denuncia que, otru añu más, los pescaores asturianos vense discriminaos a la hora de repartir el cupu de xarda a pescar, una cuestión que, en plena crisis del combustible, podría condergar a munchos pesqueros.  Un pescaor vascu puede pescar ca selmana 18.800 kilos de xarda y ún cántabru, 10.300 kilos, entanto un asturianu tien d’aguantase con una cuota individual de 3.300 kilos. Amás, pesi a que la campaña de la xarda abrió en febreru, la fuelga del tresporte torga’l movimientu del pexe per carretera, lo que tien amarrá a cuasi la metá de la flota.