• Portada
  • >
  • Muyer
  • >
  • Calendariu coeducativu “Tiempu de muyeres, muyeres nel tiempu” 2022 –  Muyeres nel cine

Calendariu coeducativu “Tiempu de muyeres, muyeres nel tiempu” 2022 –  Muyeres nel cine

  • 17 Marzu, 2022

Como ca añu, la Organización de Muyeres de la Confederación Intersindical publica’l calendariu “Tiempu de muyeres, muyeres nel tiempu” qu’en 2022 ta dedicáu a les muyeres nel cine”: trabayadores téuniques y artístiques del sector audiovisual

Como cualisquier calendariu, esti tamién val para mirar la fecha, pero obliga a ver muncho más, porque ca mes ilustra a muyeres en delles de los oficios venceyaos al cine, y acaldía ufierta una efeméride con datos biográficos d’otres tantes muyeres feministes, los sos llogros y la so llucha p’algamalos. Les páxines finales contienen, amás, una amplia propuesta d’actividaes didáutiques pa toles etapes educatives, dende’l primer ciclu d’Educación Infantil hasta la Educación de Persones Adultes.

Tantu’l calendariu como los materiales coeducativos complementarios son frutu del trabayu coordináu de les estremaes áries de muyer que formen la Organización de Muyeres de la Confederación Intersindical. Amás, siguiendo les pautes confederales de respetu a la diversidá llingüística, editase’n toles llingües oficiales de la Confederación Intersindical, incluyendo l’asturianu.

Nesta edición 2022, les ilustraciones de les muyeres de cine” que protagonicen cada mes son obra de la moza ilustradora xienense Inés Ávalos Vílchez.

La finalidá d’esta publicación ye, dende hai yá 18 años, la de reconstruyir la hestoria incompleta conocía y tresmitía tantu en llibros de testu, como nel currículum educativu y na formación personal del profesoráu. Para ello, nes sos distintes ediciones destacóse la participación de les muyeres na vida pública al traviés de les sos creaciones artístiques, musicales y lliteraries, de les sos investigaciones y afayos científicos, de les sos teoríes filosófiques y conquistes polítiques, de los sos analises históricu y periodísticu, de los sos llogros esportivos, o de les aportaciones de los sos viaxes y esploraciones.  A última hora, una revisión de la hestoria cola que pretenden contribuyir a tresformar l’imaxinariu coleutivu que mientres sieglos foi costruyendo un canon de llogros amestáu a los homes y que, poro, contribuyó a atrabancar la participación de les muyeres nos ámbitos relevantes de la vida pública y, a perpetuar aquellos otros roles basaos nel costructu de feminidá impuestu pol patriarcáu.

Nesti sen, naide niega’l poder del arte, entá ye más del séptimu, pa tresmitir y convencer, de lo que seya que pretenda, con gran rapidez y perampliu espardimientu; esto ye, pela vía directa de la emoción y al per mayor. Con esti poder, nun ye casualidá que’l mundu’l cine, na mayoría de los oficios que contien, calténgase impermeable a la participación de les muyeres. Nótese’l tiempu verbal presente, porque la paridá -tamién equí- ye una meta por algamar. Por tou ello, la tema del calendariu 2022 “Muyeres nel cine” ye un material necesario.

Ca mes amuesa a delles de les muyeres que, amás de faer cine, contribuyeron a camudar la imaxe de la muyer al traviés de les sos obres y de la so llucha por conquistar un puestu y una reconocencia nos oficios cinematográficos. Muyeres que representen a muyeres con mirada feminista, en contraposición a la tradicional mirada sobre “lo femenino”. Asina, en xineru podemos ver, ente otres pioneres, a Alice Guy, una de les creadores del llinguaxe cinematográficu (planos, llume, attrezzo, montaxe, carauterización…) y de los efeutos especiales; la primer persona en dirixir una película de ficción. Una muyer que, a pesar de rodar más de 1000 películes, de poder caltenese económicamente y de lluchar por ser reconocida internacionalmente como direutora, actriz y productora, foi esborriada de la hestoria pol eficaz métodu de l’atribución de les sos obres al home, al anónimu o, meyor entá, al olvidu intencional. A partir d’ende, el percorríu mensual ta illustráu por direutores de ficción españoles y d’otres partes del mundu, directores d’animación, de documentales, actrices, guionistes, productores, direutores de semeya,  direutores d’arte, compositores y sonidistas, montaores y xefes d’efeutos especiales, hasta llegar, n’avientu, a les direutores de festivales, programaores y distribuiores. Dalgunes de les actividaes propuestes planteguen la busca de referencies sobro muyeres nos últimos oficios mentaos, o bien nel palmarés de festivales de cine nacionales ya internacionales.

Pa faese una idega de cómo tán les coses, recomienden consultar el portal web de VISU, l’Asociación de muyeres cineastes y de medios audiovisuales, creada en 2006 coles mires de consiguir una presencia igualitaria de les cineastes y profesionales del sector que contribuya a ufiertar una representación equilibrada y realista de la muyer dientro de los conteníos.

El calendariu «Tiempu de Muyeres» ye un material coeducativo de distribución de baldre; dispón de llicencia Creative Common, polo que puede espublizase y reproducise respetando los términos de  llicencia. N’Asturies, SUATEA distribuyi exemplares impresos por aciu visites a los centros educativos públicos. Sicasí, toles persones ineteresaes tienen a la so disposición la versión dixital descargable, asina comu la propuesta completa d’actividaes colos sos respectivos recursos y el dossier de muyeres nel cine, tanto na nuestra web suatea.org, como na páxina de la Organización de Muyeres organizaciondemujeres.org.

 

Redaición InfoAsturies


This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies